Муштзани 26-солаи тоҷик Муҳаммад Ёқубов, ки аз номи Русия сабқат мекунад, бори панҷум камарбанди “WBC International”-ро ҳифз кард. Ӯ ин бор дар мусобиқаи “RCC Boxing Academy”, ки 11-уми сентябр дар Екатеринбурги Русия доир гардид, Кристиан Палмаи чилигиро шикаст дод ва дар вазни худ шикастнопазир боқӣ монд.  

Муҳаммад Ёқубов аз ҷамоати Навгилеми Исфара буда раиси ин шаҳр Баҳоваддин Баҳодурзода муштзанро бо ғолибият ва бори шашум ҳифз кардани камарбанди “WBC International” табрик гуфтааст. Зубайдулло Шомадов сухангӯйи раиси шаҳри Исфара дар саҳифаи фейсбукии худ якшанбеи 12-уми сентябр гуфтааст ҳукумати Исфара ҳамеша варзишгаронро дастгирӣ ва пуштибонӣ мекунад.

“Чанде пеш мутобиқи қарори марбутаи раиси шаҳр ба Муҳаммадхӯҷа Ёқубов ҷудо гардидани қитъаи замини наздиҳавлигӣ далели ин гуфтаҳост.”-

Ба иттилои хабаргузории sports.ru Муҳаммад Ёқубов дар вазни 59 кило дар даври чаҳорум ҳарифи чилигии худ Кристиан Палморо шикаст дод ва унвони қаҳрамонии “WBC International” -ро ҳимоя кард.

Хабаргузорӣ навиштааст, ки Ёқубов дар давраҳои аввали бозӣ ба худ бовар дошт ва бар муқобили муштзани чилигӣ зарбаҳои пайиҳами беҷавоб зад. Ҳамин тавр дар даври ҷаҳоруми бозӣ муштзани тоҷик Кристиан Палморо ба нокаути сахт фиристод ва аз пой афтонд. Муштзани чилигӣ дар даври панҷум натавонист муборизаро идома диҳад ва дастааш аз идомаи муҳориба бо Муҳаммад Ёқубов даст кашидааст.

Дар ҳамин ҳол ТВ “Варзиш” гуфтааст, дар шоми ситораҳои бокс ба ҷуз Муҳаммад Ёқубов, зодаи дигари Тоҷикистон Асрор Воҳидов низ баромад кард. Аммо ин муштзани тоҷик аз рақиби русияш Муҳаммад Шехов мағлуб гашта, аз дифоъи камарбанди WBO European маҳрум шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.