Ӯзбекистон ҷонибдори таъсиси минтақаи комили савдо дар доираи ИДМ аст, ки ба нигаҳдории шакли мавҷудаи реҷаи тиҷорат асос ёфтааст, қайд мешавад дар маълумоти Кумитаи давлатии омори Ӯзбекистон.

“Ин дар навбати худ, омили муҳими таъмини рушди устувори иҷтимоиву иқтисодии ИДМ мебошад”, - омадааст дар маълумот.

Гуфта мешавад, дар Ӯзбекистон 178 корхона бо сармоягузории мустақими Тоҷикистон амал мекунанд, ки 103-тоашон тиҷорати муштарак бо соҳибкорони ӯзбек буда, 75 корхона бо сармояи пурраи тоҷирони тоҷик фаъолият доранд.


Доираҳои кориву тиҷоратӣ дар Тоҷикистон бурунрафти сармояро ба ҳамсоякишварҳо дар навбати аввал, ба сарбории зиёди андозбандӣ дар ҷумҳурӣ нисбат медиҳанд.

“Аз ин рӯ, аксарият тиҷоратро дар ин ҷо қатъ намуда, ба кишварҳои ҳамсоя, ки дар онҳо шароити бештар мусоид фароҳам аст, интиқол медиҳанд”, - гуфт ба “Азия-Плюс” як тоҷир, ки нахост ному насабаш ифшо гардад.

Ба гуфтаи ӯ, соҳибкороне, ки то ҳол ба фаъолият дар ҷумҳурӣ идома медиҳанд, маҷбуранд, ки қисмати зиёди даромади худро пинҳон кунанд, то ки дар ин шароити сарбории зиёди андоз ба як навъе вуҷуд дошта бошанд.

Дар натиҷа, изҳор дошт тоҷир, буҷети кишвар аз воридшавии маблағи муайян аз пардохти андоз маҳрум мешавад.

Зимнан илова шуд, ки сабуксозии сарбории андоз ба афзоиши босуръати шумори соҳибкорон ва мутаносибан, зиёдшавии даромад ба буҷет мусоидат хоҳад кард.

Ёдрас мекунем, ки моҳи майи соли гузашта президенти Тоҷикистон Эмомалӣ Раҳмон дастур дод, ки бо назардошти манфиатҳои субъектҳои соҳибкорӣ, лоиҳаи Кодекси андоз дар таҳрири нав таҳия шавад.

Моҳи феврали соли ҷорӣ вазири молияи Тоҷикистон Файзиддин Қаҳҳорзода ба рӯзноманигорон хабар дод, ки Кодекси нави андоз то моҳи сентябри ҳамин сол мавриди амал қарор мегирад, то ки бар асоси он сохторҳои марбута буҷети соли 2021-ро омода намоянд.

Лекин қонунгузории нави андоз то ҳол мавриди амал қарор нагирифтааст.

Дар Кумитаи андоз ба таъхир афтодани қабули Кодекси нави андозро ба вазъи марбут ба пандемияи коронавирус вобаста медонанд.

Дар Кумита таъкид мекунанд, ки дар лоиҳаи Кодекси нави андоз барои тиҷорат, бахусус барои соҳибкории истеҳсолӣ имтиёзҳои зиёд пешбинӣ шудааст.

Қобили зикр аст, ки аз қабули Кодекси ҳозир амалкунандаи андози Тоҷикистон ҳамагӣ 6 сол пур мешавад: он 1 январи соли 2013 мавриди амал қарор гирифт.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.