Додситонии Суғд алайҳи ду мудири мактаб ва як нозири шуъбаи маорифи шаҳри Панҷакент бо гумони ғайриқонунӣ додани қитъаи замин парвандаи ҷиноӣ боз кардааст. Масъулини соҳаи маориф бар он муттаҳам мешаванд, ки аз ҳисоби замини мактаб барои сохтмони мағозаву ошхона замин додаанд.

Як масъули огаҳ аз парванда дар Додситонии вилояти Суғд ба “Азия-Плюс” гуфт бо ҷурми ғайриқонунӣ додани қитъаи замин нисбати мудирони мактаби миёнаи рақами 61 ва 63-и шаҳри Панҷакент Қаҳҳор Қурбоналиев ва Мурод Шехимов ва нозири шуъбаи маорифи ин шаҳр Музаффар Усмонов парвандаи ҷиноӣ оғоз гардида, тафтишоти пешакӣ идома дорад.

“Директори мактаби рақами 61-и шаҳри Панҷакент Қурбоналиев Қ.М бо маслиҳати пешакӣ бо нозири шӯъбаи маорифи ҳамин шаҳр Усмонов М.Ҳ як сол пеш аз ҳудуди заминҳои мактаб ба шаҳрванд Мутаилов С.М бидуни қарори дахлдори Ҳукумати Тоҷикистон ва раиси шаҳр 30 метри мураббаъ қитъаи заминро барои сохтмони мағоза ва ошхона ғайриқонунӣ додаанд”,-хабар медиҳад додсионии Суғд

Манбаъ илова кард, ки ба ҳамин монанд директори МТМУ № 63-и шаҳри Панҷакент Мурод Шехимов моҳи апрели соли 2020 аз ҳисоби заминҳои мактаб 100 метри мураббаъ қитъаи заминро барои сохтмони мағоза додааст.

Мақомоти додситонии шаҳри Панҷакент алайҳи ҳар се ин масъули соҳаи маориф дар асоси моддаи 338 иловаи 1 қисмӣ 2-и Кодекси ҷиноятӣ парвандаи ҷиноӣ боз кардааанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.