Рӯзи 4 август як чархболи тамғаи МИ-8 Нерӯҳои марзбонии Тоҷикистон, ки дар ҳайати 5 нафар барои наҷоти сайёҳони рус рафта буд, ба садама дучор шуд. Ҳангоми фуруд омадан чархбол ба кӯҳ бархӯрда, дар натиҷа роҳбари ҳайати халабонҳои чархбол Сергей Тютин ба ҳалокат расид. Бо гузашти панҷ рӯз ҷасади халабон (лётчик, пилот) ҳоло ҳам дар ҷойи ҳодиса аст.

Ба гуфтаи роҳбари Сарраёсати ҳифзи аҳолӣ ва қаламрави Кумитаи ҳолатҳои фавқулода Ҷамшед Камолов, айни замон имдодгарон чархболи хадамоти марзбониро интизоранд, то ки ба ҷойи фоҷеа рафта, ҷасади халабонро оранд.

- Дар Душанбе ва ВМКБ ду гурӯҳи наҷотдиҳандагон ташкил шуд. Ҳоло онҳо интизори чархболи неруҳои марзбонианд, - гуфт Ҷамшед Камолов дар сӯҳбати телефонӣ бо “Азия-Плюс”. - Аммо ҳоло ҳама мушкил сари он аст, ки танҳо ба чанде халабонҳо иҷоза дода шудааст, ки дар баландии зиёда аз 5 ҳазор метр парвоз кунанд. Яке аз чунин мутахассисони касбӣ Сергей Тютин буд. Ҷасади ӯ дар баландии 5300 метр аст.

Айни замон халабоне ҷустуҷӯ мешавад, ки таҷрибаи кофӣ ва барои парвоз ба ин сатҳ баландӣ иҷозатнома дошта бошад.

Ӯ мегӯяд, як варианти дигар ҳам вуҷуд дорад, ки поёнтар парвоз кардан лозим аст, аммо наҷотдиҳандагон бояд пиёда ба маҳалли фоҷиа бароянд ва бо назардошти аз он ҷо бо худ овардани ҷасад, ин роҳи хеле душвор аст.

Камолов зикр кард, ки дар навбати аввал ба шахсоне кумак лозим буд, ки зинда монданд. Барои имкнпазир шудани ба ҷойи дигар интиқол додан маҷрӯҳонро лозим омад, ки мудддати ду рӯз мустақилона ба поин фароянд ва сипас аз он ҷо бо чархболи Неруҳои марзбонии Тоҷикистон ба Душанбе бурда шуданд.

Ба гуфтаи Камолов, ҳама гуна амалиёти ҷустуҷӯ ва наҷот дар чунин шароити душвори кӯҳистон наметавонад дар як муддати кӯтоҳ амалӣ шавад.

Коршиносон мегӯянд, дар чунин шароит танҳо якчанд нафар - наҷотдиҳандагон ва кӯҳнавардони ботаҷрибае, ки маҳалро хуб омӯхтаанду пайраҳаву гузаргоҳҳои бехатарро медонанд, кор карда метавонанд. Ин гуна одамон дар кишвар хеле каманд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.