Дар Вазорати мудофиаи миллии Ҷумҳурии Туркия 18 январ вохӯрии сафири Ҷумҳурии Тоҷикистон дар Туркия Ашрафҷон Гулов бо вазири ин ниҳод Хулуси Акар доир гардид.

Тавре ки Вазорати корҳои хориҷии ҷумҳурӣ хабар медиҳад, зимни вохурӣ ҷонибҳо ҳолати кунунӣ ва дурнамои ҳамкориҳои ду кишварро дар самти мудофиа мавриди муҳокима қарор дода, вобаста ба вазъи минтақа ва ҷаҳон табодули афкор намуданд.

Аз дигар ҷузъиёт ва масоили матраҳшуда дар ин мулоқот маълумот дода намешавад.

Ёдрас мекунем, ки имсол ба роҳандозии муносибатҳои дипломатӣ байни Тоҷикистону Туркия 30 сол пур мешавад. Дар ин давра байни кишварҳо зиёда аз 65 созишномаву ёддошт ва дигар аснод ба имзо расидааст.

Тоҷикистону Туркия дар солҳои наздик ният доранд, ки тавассути роҳандозии ҳамкориҳо дар соҳаҳои афзалиятноки иқтисод, ҳаҷми савдои дуҷонибаро то ба 1 млрд доллар расонанд.

Тибқи маълумоти Агентии омори назди президенти ҷумҳурӣ, давоми моҳҳои январ-ноябри соли 2021 ҳаҷми гардиши мол байни Тоҷикистону Туркия ҳудуди 354 млн долларро ташкил додааст, ки 21,1% зиёдтар нисбат ба ҳамин давраи соли 2020 аст. Ҳаҷми содироти мол аз Тоҷикистон ба Туркия 212 млн доллар ва воридоти маҳсулот аз Туркия ба Тоҷикистон каме бештар аз 142 млн долларро ташкил додааст.

Туркия яке аз кишварҳои камшумори шарики тиҷоратии Тоҷикистон мебошад, ки ҷумҳурӣ бо он тавозуни мусбати савдои дуҷониба дорад, яъне содирот аз воридот бештар аст.

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.