Маблағи гирифтани иҷозатнома барои сохтмони манзил ва нуқтаҳои фурӯш дар шаҳри Душанбе аз 165 то 220 сомониро барои 1 метри мураббаъи иншоот ташкил медиҳад.

Вакилони палатаи поёнии парлумони Тоҷикистон аз лоиҳаи қонуни аз ҷониби ҳукумат пешниҳодшуда дар бораи ворид намудани тағйироту илова ба қонун «Дар бораи дигар пардохтҳои ҳатмӣ ба буҷет» якдилона дастгирӣ карданд.

Мувофиқи тағйироту иловаҳо, минбаъд ширкатҳои сохтмон, ки дар қаламрави шаҳри Душанбе ба сохтмони манзил ва нуқтаҳои фурӯш машғуланд, барои дастрас намудани иҷозатномаи ҳукуматдорони шаҳр хироҷ пардохт мекунанд.

Зимни суханронӣ назди вакилони парлумон доир ба ин масъала вазири рушди иқтисод ва савдои Тоҷикистон Неъматулло Ҳикматуллозода изҳор намуд, ки ширкатҳои машғул ба сохтмони биноҳои истиқоматӣ ва нуқтаҳои фурӯш дар пойтахт то ҳол чунин хироҷ пардохт намекарданд.

Вазир таъкид дошт, ки арзиши гирифтани иҷозатнома барои сохтмон аз 165 то 220 сомониро барои як метри мураббаъи иншоот ташкил медиҳад.

Дар бораи дар кадом ҳолатҳо пардохт шудани 165 сомонӣ ва 220 сомонӣ вазир маълумот надод.

Ин воситаҳо ба суратҳисоби махсуси ҳукуматдорони пойтахт гузаронида мешаванд, ки онро бо ин мақсад Вазорати молияи Тоҷикистон боз мекунад.

Ташкилотҳои буҷетии ҷумҳурӣ, ки ба сохтмони иншооти таъиноти саноатӣ ва иҷтимоӣ, иншооти зербинои бахши сайёҳӣ машғалунд, аз пардохти чунин хироҷ озод карда мешаванд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.