Ёвари президенти Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода ва раиси вилояти Суғд Раҷаббой Аҳмадзода рӯзи 9 июн ҷиҳати шиносоӣ бо ҷараёни корҳои ободониву созандагӣ аз ноҳияи Мастчоҳ боздид намуданд.

Бино ба иттилои хадамоти матбуоти раиси вилояти Суғд, онҳо бо сохтмони мактабу кӯдакистонҳо, толори варзишӣ, бинои маъмурии ҲХДТ дар ноҳия, Маркази адлия, майдони Парчами давлатӣ, монументи “Пахта” ва навсозии боғи фарҳангиву фароғатӣ шинос шуданд.

Гуфта мешавад, онҳо инчунин бо ҷараёни сохтмони Қасри фарҳанг ва Варзишгоҳи замонавӣ дар маркази ноҳия аз наздик шинос шуда, иттилоъ дода шуд, ки Қасри фарҳанг барои 1 ҳазор ҷойи нишаст бо харҷи беш аз 30 млн сомонӣ ва Варзишгоҳи марказӣ бо 10 ҳазор ҷойи нишаст бо 11 млн сомонӣ сохта мешавад.

Қобили зикр аст, ки ноҳияи Мастчоҳ ба ҷашни 23-юмин солгарди солгарди истиқрори сулҳ ва ризоияти миллӣ дар сатҳи ҷумҳуриявӣ, ки дар Тоҷикистон ҳамасола рӯзи 27-уми июн ҳамчун Рӯзи ваҳдати миллӣ таҷлил мегардад, омодагӣ мегирад.

Дар чорабиниҳои ҷашнӣ дар Мастчоҳ раисҷумҳур Эмомалӣ Раҳмон, аъзои ҳукумат, вакилони мардумӣ, ходимони илму фарҳанг, аҳли ҷомеа ва намояндагони диаспораҳои тоҷикон дар кишварҳои хориҷи дуру наздик ширкат меварзанд.

Дар доираи сафар ба ноҳияи Мастчоҳ президент дар маросими мавриди баҳрабардорӣ қарор гирифтани наздики 30 иншооти нави таъиноти иҷтимоӣ ва иқтисодӣ иштирок карда, бо фаъолони ноҳия вомехӯрад ва бо дастовардҳои соҳаҳои саноату бахши кишоварзӣ шинос мешавад.

Рӯзи 27-уми июни соли 1997 дар Маскав байни ҳукумати Тоҷикистон ва Иттиҳоди нерӯҳои мухолифини тоҷик Созишномаи истиқрори сулҳ ва ризоияти миллӣ ба имзо расид, ки ба ҷанги шаҳрвандии солҳои 1992-97 хотима бахшид.

Мувофиқи фармони сарвари давлат ва қонуни қабулшуда аз 22-юми майи соли 1998, ҷашни Рӯзи ваҳдати миллӣ яке аз идҳои расмии Тоҷикистон мебошад. Мувофиқи меъёрҳои қонунгузории Тоҷикистон, 27-уми июн дар ҷумҳурӣ рӯзи истироҳат эълон шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.