Шаҳрдории Душанбе талабот ба иҷрои корҳои сохтмонро сангинтар кард, то ки ба интихоби ширкати арзанда, ҳимоя аз ҳиссагузорон ва моликон ва пешгирии ба таври сунъӣ ба муҳлати тӯлони давом додани корҳои сохтмон мусоидат карда шавад.
Сарраёсати меъморӣ ва шаҳрсозии Душанбе Тартиби таҳия ва пешниҳоди ҳуҷҷатҳои пешазлоиҳавии корҳои сохтмониро таҳия ва тасдиқ намуд. Тартиби мазкур бар асоси қарори раиси шаҳри Душанбе аз 16 июни соли равон таҳия шудааст.
Дар Тартиби нав пеш аз ҳама, пешбинӣ мешавад, ки ширкати бинокор бояд маълумотномаи тасдиқшуда дар бораи набудани қарз аз андоз ва дигар пардохтҳои ҳатмиро пешниҳод намояд.
Ҳамчунин паймонкори имконпазир бояд маълумотномаи асоснокии лоиҳаи ангоравӣ бо нишондодҳои техникӣ - иқтисодӣ (пешакӣ) дошта бошад.
Ғайр аз ин, ширкати сохтмонӣ уҳдадор мешавад, ки мавҷудияти суратҳисоби бонкиро, ки дар он на камтар аз 20% аз арзиши умумии бинои сохташаванда маҳфуз аст, ба таври ҳуҷҷатӣ тасдиқ намояд. Ҳамчунин ширкат бояд мактуби кафолатноки бонкӣ ба маблағи на камтар аз 5% аз арзиши иншооти сохтмонро пешниҳод кунад.
Илова бар ин, кушодани суратҳисоби ҷудогона “дар бонкҳои муваффақ” барои соҳибкорони инфиродӣ ва ҷамъоварии маблағҳои ҳиссагузорон талаб мешавад. Шояд зери мафҳуми “бонкҳои муваффақ” бонкҳои низомсоз дар назар бошанд, ки ҳамасола аз ҷониби Бонки миллӣ муайян карда мешаванд.
Ба ширкати сохтмоние, ки бори аввал ба корҳои сохтмонӣ машғул мегардад, таҳияи лоиҳа барои сохтмони танҳо як бино (як блок) иҷоза дода мешавад.
Барои сохтмони маҷмааи биноҳо танҳо ба ширкатҳои сохтмонии таҷрибадор ва дорои заминаи моддию техникии замонавӣ (гардиши солона бояд на камтар аз 50 млн сомонӣ бошад) бартарият дода мешавад.
Ҳамчунин дар тартиби нав шартҳои зерини “мушкилдор” эътироф гардидани ширкати сохтмонӣ муқаррар карда шудааст:
- оғози корҳои сохтмон бидуни анҷоми пардохтҳои ҳатмӣ;
- дағалона вайрон кардани меъёрҳои сохтмон;
- сохтмони худсаронаи биноҳои иловагӣ ва ошёнаи дар лоиҳа пешбининашуда;
- таъхири беасоси ба истифода додани иншооти сохтмон ба муҳлати зиёда аз шаш моҳ.
Талаботи нав ба сохтмони иншоот аз ҳисоби буҷети давлатӣ ва хонаҳои хусусӣ (шахсӣ) дахл надоранд.
Дар Сарраёсати меъморӣ ва шаҳрсозӣ зарурати ҷорӣ шудани тадбирҳои иловагиро интихоби паймонкорони арзанда, ҳимоя аз ҳуқуқ ва манфиатҳои қонунии саҳмгузорон ва моликон, инчунин бартараф намудани ҳолатҳои ба таври сунъӣ кашол додани муҳлатҳои анҷоми корҳои сохтмон маънидод мекунанд.
Руcский