Хуҷанд. 17-уми июн. «Азия-Плюс» — | Дар ноҳияи Ашт барои оилаҳое, ки дар таърихи 12-уми июни соли ҷорӣ аз сели даҳшатнок осеб дида уданд, сохтмони манзили зист оғоз мегардад.

Тавре ба ОИ «Азия-Плюс» аз ҳукумати вилояти Суғд хабар доданд, пагоҳ дар шаҳраки Бахмали ноҳия маросими гузоштани хишти аввал ба сохтмони манзилҳо барои оилаҳои осебдидаи деҳаҳои Бободархон ва Сарои ҷамоати Понғоз доир мегардад. «Комиссияи дар маҳалли ҳодиса фаъолиятдошта ошкор сохт, ки на 34 манзил, балки танҳо 17 манзил пурра хароб гардида, соҳибони манзилҳои қисман харобшуда низ дар шаҳраки Бахмал 10 сотихӣ қитъаи замин гирифта, аз ҳисоби худ манзили зист бунёд мекунанд», - гуфтанд дар ҳукумати вилоят.

Ба иттилои манбаъ, барои 17 оилае, ки манзили зисташон пурра хароб гардидааст, шаҳру навоҳии вилояти Суғд манзили сеҳуҷрагӣ бунёд хоҳанд кард. «Анҷоми сохтмони манзилҳо то 1-уми августи соли ҷорӣ ба нақша гирифта шуда, онҳо бо ҳама асбобу лавозимоти рӯзгор таъмин карда мешаванд», - гуфт сарчашма.

Зимнан зикр гардид, ки айни замон маҳалли сохтмон бо оби нӯшокӣ ва нерӯи барқ таъмин гардида, шоми имрӯз 17 оилаи бесарпаноҳмонда ба маҳалли сохтмон меоянд. «То анҷоми сохтмон онҳо дар хаймаҳо зиндагӣ хоҳанд кард ва бо кӯмаки молиявии ҳукумати вилояти Суғд ҳамеша бо маводи ғизоӣ таъмин хоҳанд буд», - афзуд манбаъ.

Ёдрас мекунем, нимаи дуввуми рӯзи 12-уми июн дар ноҳияҳои Ашт, Ғончӣ ва Панҷакент бар асари боришот зиёд сел омада, ба манзили зист ва зербинои маҳаллаҳои аҳолинишин хисороти беҳад ворид сохт.