Душанбе. 20-уми июн. «Азия-Плюс» — | Имрӯз дар шаҳри Душанбе таҳти раёсати вазири маорифи Тоҷикистон Абдуҷаббор Раҳмонов Конфронси XVIII-уми вазирони маорифи кишварҳои узви ИДМ ба кори худ идома медиҳад.

Тавре ба ОИ «Азия-Плюс» аз Вазорати маорифи ҷумҳурӣ иттилоъ доданд, дар ҷараёни кори ҷаласа аз фаъолияти ҳамкории кишварҳои узв дар давраи сипаригашта натиҷагирӣ шуда, дурнамои рушди муносибатҳо муайян карда мешаванд.  «Дар конфронс ҳамчунин  масоили таъсиси Донишгоҳи шабакавии ИДМ, ҷараёни омодагӣ ба Анҷумани II-уми омӯзгорон ва кормандони бахши маорифи кишварҳои узви иттиҳод ва фаъолияти созмонҳои заминавии ИДМ оид ба ҳамкорӣ дар бахши маориф баррасӣ мешаванд, - гуфтанд дар вазорат.

Ба иттилои манбаъ,  дар чаҳорҷӯби ҷараёни кори конфронс мулоқоти вазири маорифи Тоҷикистон Абдуҷаббор Раҳмонов ва Русия Андрей Фурсенко баргузор шуда, дар он Протоколи таъсиси филиалҳои Донишкадаи энергетикии Маскав ва Донишгоҳи миллии пажӯҳиши технологии Русия дар Душанбе ба имзо мерасад.

Аз Вазорати маориф ҳамчунин хабар доданд, ки пас аз анҷоми кори конфронс таҳти унвони «Омодасозии мутахассисон ва кадрҳои илмии нав дар партави рушди инноватсионии кишварҳо дар масоили метрология, стандартизатсия ва сертификатсия дар кишварҳои ИДМ» баргузории семинар-тренинг дар назар аст.