Чанде қабл Вазорати молия ва Кумитаи андози назди ҳукумати Тоҷикистон “Оид ба индексатсияи андозаҳои пардохт барои патент” фармоиши муштарак ба имзо расониданд. Мувофиқи ин санад, андозаи патенти сарояндагон дар ҷашну маъракаҳо аз 720 сомонӣ то ба 788 сомонӣ зиёд мешавад.
Мувофиқи ин санад, арзиши патент барои соҳибкорони инфиродӣ ба андозаи 9,4% зиёд карда мешавад.
Чунин индексатсия ҳамасола бо назардошти сатҳи таваррум дар соли гузашта гузаронида мешавад: соли 2020 мизони таваррум 9,4 фоизро ташкил дода, мутаносибан арзиши патент, ки ба он андоз аз даромад ва андози иҷтимоӣ дохил мешавад, ба ҳамин сатҳ боло бурда мешавад.
Мувофиқи маълумоти расмии оморӣ, то 1 январи соли 2021 дар ҷумҳурӣ наздики 340 ҳазор соҳибкороне ба қайд гирифта шудаанд, ки бар асоси патент фаъолият мекунанд.
Хабарнигори “Азия-Плюс” дар ин бора бо сарояндагони тоҷик суҳбат карда, ҳамчунин аз онҳо пурсид, ки пандемияро чӣ гуна паси сар кардаанду то чӣ андоза коронавирус нақшаҳои онҳоро тағйир дод.
“Пандемия даромади маро 70% кам кард”
Овозхони шинохта Ҷонибек Муродов мегӯяд, қиматшавии патент ба ҳеҷ гунае ба фаъолияти эҷодии ӯ таъсир намерасонад, лекин пандемия ба нақшаҳои ӯ тағйироти ҷиддӣ ворид кардааст.
- Шукри Худо, ки ба коронавирус гирифтор нашудам, зеро гӯшанишиниро ихтиёр намуда, ҳамаи қоидаҳои эҳтиёткориро риоя кардам, - иброз медорад ӯ. – Лекин бар асари падемия лозим омад, ки ҳудуди 20 консерт ва 30 чорабиниро дар хориҷи кишвар, аз ҷумла Ӯзбекистон, Русия, Дубай, ИМА ва дигар кишварҳо бекор кунам.
Ба гуфтаи ҳунарманд, ба вақти дигар гузаронидани консертҳо ва бекор шудани чорабиниҳо ҳудуди 70% даромади ӯро кам кардааст.
- Худо хоҳад, моҳи март сафарҳо ба хориҷи кишвар оғоз мегарданд. Соли навро мо бо суруди “Ғамгин машав, Худо ҳаст” шурӯъ кардем. Он ба ҳамаи он касоне, ки бар асари коронавирус ва дигар бемориҳо наздикони худро аз даст доданд, бахшида шудааст. Баъдтар боз як клипи нав ҳам омода мекунем, - гуфт ӯ.
“Ба мо таътил ваъда дода буданд”
Овозхон Дамирбек Олимов мегӯяд, мақомоти андоз ваъда дода буданд, ки таътил медиҳанд, лекин фиреб кардаанд.
- Замони пандемия мо бо ҳамкасбон ариза навишта, хостем, ки пардохти маблағи патентро муваққатан боздорем, чунки ҳама ҷо карантин буду мо бекор мондем. Дар мақомоти андоз гуфтанд, ки 2-3 моҳ моро аз пардохти андоз озод мекунанд. Мо розӣ шудем, лекин баъди чанде занг зада, гуфтанд, ки мо бояд андозҳоро супорем, - қайд кард Дамирбек.
Дар давраи пандемия даромади Олимов наздики 75-80% кам шуда, аммо барои аз даст надодани мухлисону ҳаводорон ӯ бо ҳамкоронаш клип наворбардорӣ карда, онлайн-консерт намоиш додаанд.
-Бо ҳамкорон тасмим гирифтем, ки онлайн-консерт барпо мекунем. Онро наворбардорӣ кардаву дар YouTube гузоштем. Сарпарасте надоштем, ба ин кор аз ҳисоби маблағҳои худамон зиёда аз 35 ҳазор сомонӣ сарф кардем, - гуфт ӯ.
Дамирбек Олимов ҳамчунин зикр кард, ки бар асари пандемияи коронавирус 5 консерташ дар хориҷи кишвар бекор шудааст.
“50 сомонӣ барои сарояндагон пули зиёд нест”
- Вақте баргузории консерт иҷоза шаваду тӯйҳо бисёр шаванд, 50 сомонӣ қиматшавии патент барои сарояндагон чизе нест. Дар як чорабинии худ овозхон метавонад 10 баробар зиёдтар – 500 сомонӣ кор кунад, - мегӯяд сароянда Зиёвиддини Нурзод.
То пандемия Нурзод ният дошт, ки консерт баргузор кунад, лекин маҷбур шуд, ки онро ба вақти дигар мавқуф гузорад.
- Пандемия ба даромадҳои ман таъсири манфӣ расонида, ҳаҷми онҳо тақрибан 50% кам шуд, - изҳор дошт овозхон.
“Консертҳоро хеле пазмон шудем”
- Агар арзиши патентро боло бурда бошанд, пас лозим меояд, ки онро пардохт кунем, - мегӯяд овозхон Хуҷастаи Мирзовалӣ.
Ӯ изҳор намуд, ки замони пандемияи коронавирус асосан хонанишин буд.
- Консертҳоро хеле пазмон шудем, аллакай як сол инҷониб дар саҳнаҳои бузург ҳунарнамоӣ намекунем. Ният доштем, ки бо Мадина дар Австралия консерт намоиш диҳем, лекин бо сабаби коронавирус он бекор шуд, - гуфт сароянда.
Ҳамчунин бар асари пандемия ӯ натавонистааст, ки барои иштирок дар чорабиниҳои ҷашни Наврӯз ба Фаронса равад. Барои ин ӯ ҳатто билету раводид ҳам гирифта буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
Руcский