Кумитаи бехатарии озуқавории назди Ҳукумати Ҷумхурии Тоҷикистон ва Созмони Милали Муттаҳид (СММ) ҷаласаи сатҳи баландро оид ба муаррифии Нақшаи миллии низоми озуқаворӣ бо иштироки намояндагони сохторҳои давлатӣ, Созмони Милали Муттаҳид, шарикони рушд, ҷомеаи шаҳрвандӣ ва бахши хусусӣ баргузор намуданд.  

Ин нишаст идомаи Саммити глобалӣ оид ба низоми озуқаворӣ мебошад, ки моҳи сентябри соли 2021 дар шаҳри Рим баргузор шуд, ки дар он Дабири кулли СММ аз кишварҳо даъват ба амал овард, то низомҳои озуқаи устуворро барои вусъат бахшидан ба дастрасӣ ба Ҳадафҳои Рушди Устувор (ҲРУ) ва ноил шудан ба рушди солимтар ва устувортар қабул намоянд.

Таъмини бехатарии озуқаворӣ яке аз панҷ самтҳои асосии Стратегияи миллии рушди Тоҷикистон мебошад, зеро сарфи назар аз беҳбуди вазъи иҷтимоию иқтисодӣ аз ҳар се як хонавода аз ҷиҳати амнияти озуқаворӣ осебпазир ҳисобида мешавад, ки ин ба кӯдакон бештар таъсири манфӣ мерасонад.

Набудани ғизои кофӣ ва босифат рушди ҷисмӣ ва равонии кӯдаконро маҳдуд мекунад ва ба маҳсулнокии ояндаи фаъолияти онҳо таъсири манфӣ мерасонад. Дар натиҷа, камғизоӣ ҳар сол ба кишварҳо талафоти зиёди иқтисодӣ меорад.

Хонум Сезин Синаноғлу, Ҳамоҳангсози доимии СММ, зимни суханронӣ дар чорабинӣ чунин таъкид намуд: “Ба роҳ мондани низоми озуқаи устувор на танҳо барои таъмини бехатарии озуқаворӣ ва ғизо, балки барои рушди иқтисоди сабз ва таъмини ҷойҳои нави корӣ муҳим аст. Мо бояд дар мавриди зиёд намудани истеҳсоли ғизо, таъсири он ба табиатро низ ба инобат гирем. Дар як қитъаи замин бо истифода аз усулҳои устувори кишоварзӣ бештар маҳсулоти хӯрокворӣ истеҳсол намудан мумкин аст. СММ дар Тоҷикистон омода аст, ки дар татбиқи нақшаи миллии низоми озуқаворӣ ҷиҳати таъмини озуқаи бехатар ва серғизо барои ҳама ҳамкорӣ намояд.”

«Таъмини бехатарии озуқаворӣ аз самтҳои афзалиятноки ҳар як давлат буда, Тоҷикистон низ дар ин самт пайваста кӯшиш ба харҷ медиҳад. Ҳадаф аз қабул ва тасвиби ин иқдом беҳбуди бехатарии озуқаворӣ дар кишвар аст. Он вазорату идораҳоро барои андешидани чораҳои зарурӣ ҷиҳати аз байн бурдани гуруснагӣ, камғизоӣ ва камбизоатӣ ҳавасманд хоҳад кард», - иброз дошт Файзуллозода Муҳаммадсаид Убайдулло, Раиси Кумитаи бехатарии озуқавории назди Ҳукумати Тоҷикистон.

Нақшаи миллии низоми озуқаворӣ, ки барои ҳалли камбудиҳо ва мушкилоти мавҷуда дар соҳаи устувори озуқа дар кишвар пешбинӣ шудааст, тамоми ҷузъҳои асосии заруриро дар бар мегирад: истеҳсол, коркард, тақсимоти озуқаворӣ, стандартҳои бехатарӣ, фурӯш, истеъмол ва истеъмоли он.

Ҳадафҳо ва фаъолиятҳои Нақша аз инҳо иборатанд: дастрасӣ ба озуқавории бехатар ва серғизо барои ҳама, истифодаи устувори захираҳои табиӣ, истеҳсоли органикӣ, некӯаҳволӣ ва баробарӣ ва устуворӣ (барқарорсозӣ).