Дар Пажӯҳишгоҳи гастроентерология, маъруф ба номи «клиникаи Мансуров» бемории Қадами Қурбон, овозхони маъруфи маҳаллихон дар минтақаи Кӯлоб ва яке аз писандидатарин овозхонҳои ҷавонон дар миёни корбарони шабакаҳои иҷтимоиро маълум карданд. Ин овозхон гирифтори бемории захми рӯдаи 12-ангушта будааст. Дар ин бора ба «Азия-Плюс» аз Вазорати тандурустӣ хабар доданд.

Бино ба иттилои манбаъ, ташхис ва табобати Қадами Қурбон дар ин беморхона ройгон ба роҳ монда шуда, табобати овозхон зери назорати вазир Ҷамолиддин Абуллозода қарор дорад.

Инчунин ҳамсари сароянда Ҷонона Шамсиддинова дар як суҳбати телефонӣ ба «Азия-Плюс» хабар дод, ки бо дастгирии Вазорати тандурустӣ овозхонро аз зодгоҳаш деҳаи Чагами ноҳияи Шамсиддини Шоҳин бо автомашинаи ёрии таъҷилӣ  ба Душанбе барои муолиҷа овардааанд.

Ба гуфтаи Шамсиддинова, ҳамсараш се рӯз пеш бо мошини ёрии таъҷилӣ ба Душанбе оварда шуда, дар Пожуҳишгоҳи гостроэнтерология, машҳур ба беморхонаи «клиникаи Мансуров» бистарӣ шудааст.

Ӯ гуфт, ки танҳо имрӯз имкон ба ӯ даст дод то ба дидори шавҳараш ба пойтахт биёяд ва хеле хушҳол низ гардид, ки шавҳарашро аз пештара дида бо чеҳраи болида дарёфтааст.

«Хеле хурсанд шудам, вазъи саломатияш беҳтар аст ва табобатро пизишкон оғоз намудаанд. Сипос ба роҳбарияти Вазорати тандурустӣ ва табибон, ки моро дастгирӣ намуданд ва танҳо нагузоштанд. Умед дорем, ки  шавҳарам базудӣ сиҳат ёфта, ба хона бармегарданд», - гуфт завҷаи Қадами Қурбон.

Ҳамзамон дар Вазорати тандурустӣ ва ҳифзи иҷтимоӣ низ гуфтанд, ки имрӯз намояндагони ин ниҳод ба аёдати овозхон рафта, аз рафти муолиҷаи ӯ бохабар гардиданд.

Блогнавис Қурбон Неъматов низ дар саҳифаи худ дар Ютуб видеоеро нашр кардааст, ки Қадами Қурбон дар беморхона қарор дошта, аз Вазорати тандурустӣ ва дигар афроди хайрхоҳ миннатдорӣ мекунад.

Бояд гуфт, ки ҳамсари Қадами Қурбон, қаблан гуфта буд, ки ӯ беш аз 4 моҳ бемор буда, барои табобат ба маблағ ниёз дорад.

Шамсиддинова гуфта буд, ки табибон бемории шавҳарашро  мушаххас накардаанд, зеро ташхисҳо нишон медиҳад, ки ӯ ҳеч бемории ҷиддие надорад. Ба гуфтаи ҳамсараш, онҳо тақрибан ба ҳама беморхонаҳои Душанбе рафтаанд, вале табибон дар муайян кардани дарди ҳамсараш оҷиз мондаанд.

Аммо ба гуфтаи ӯ, яке аз пизишкон ба онҳо тавсия додааст, ки ӯро барои муолиҷа ба хориҷа баранд, то бемории шавҳарашро ташхис ва муайян кунанд. Вале ӯ мегӯяд, ки онҳо барои ин кор пул надоранд.

“Барои ба хориҷа бурдан, ташхис ва табобат пули зиёд лозим аст, ки мо онро надорем. Мо ҳатто барои доруворӣ пул надорем. Намедонем чӣ беморӣ аст, ки шавҳарамро ин қадар азоб медиҳад. Ин беморӣ якбора хуруҷ мекунад ва дар як шабонарӯз 8-9 соат давом мекунад, ӯ  бо азобе тоб меорад ва боз дард рафъ мешавад. Ин аҳвол 5 моҳ боз давом дорад»,-мегӯяд ҳамсари овозхон.

Худи Қадами Қурбон дар як наворе, ки аз сӯйи бархе блогерон дар хонаи духтараш дар ноҳияи Восеъ сабт шудааст, мегӯяд, ки дард дар қисмати гурдаи росташ аст ва хеле дарди ҷонкоҳе аст, ки ӯро бистарӣ кардааст.

Ҳамсари Қадами Қурбон афзуд, барои онҳо бемор будани шавҳараш хеле мушкил аст, зеро хонаводаро худи ӯ таъмин мекунад. Ӯ аз мухлисони ҳамсараш хоҳиш дорад, ки ба шавҳараш ёрӣ расонанд, зеро онҳо 6 фарзанд доранду мехоҳад Қадам болои сари онҳо бошад.

Блогнавис Қурбон Неъматов қаблан низ дар саҳифаи худ дар Ютуб видеоеро нашр карда буд, ки гуруҳе аз блогнависон ба хонаи духтари овозхон ташриф овардаанд. Қадами Қурбон дар ин навор дар бораи бемориаш нақл мекунад ва аз мардуми хайрхоҳ хоҳиш мекунад, ки дар ин рӯзҳои мушкил ӯро танҳо нагузоранд.

Овозхон ҳам дар ин видео аз дӯстонаш, ки ба иқрори худи ӯ ҳатто “калкулятор дар ҳисоб кардани онҳо сардаргум мешуд”, шикоят мекунад, ки ҳатто боре барояш занг намезананд.

Ҳамсари овозхон дар суҳбати имрӯз ба “Азия-Плюс” гуфт, ки пас аз нашри видеои дирӯза, мардум ба ёрии ҳамсараш шитофтаанд ва онҳо табобатро дар рӯзҳои наздик дигарбора оғоз мекунанд.

Ёдовар мешавем, ки моҳи феврали соли 2021 Қадам Қурбон ба «Азия-Плюс» гуфта буд, ки чаҳор моҳ боз ба як бемории номаълуме гирифтор будааст, ки ӯро то дами марг бурдааст.

Ин овозхони тоҷик гуфта буд, ки  тӯли чор моҳ бемории барояш номаълум ӯро азият медод, ки ҳеҷ доруву табибе натавонистааст дардашро даво бахшад. Ӯ гуфт, баъди муолиҷаҳои тӯлонӣ 15 рӯз барои дақиқ намудани беморӣ дар беморхонаи «Мадади Акбар»-и шаҳри Душанбе бистарӣ шуда, табобат гирифтааст.

«Ягон дору даво накард, 15 рӯз дар беморхонаи «Мадади Акбар» бистарӣ будам, гуфтанд, ки бемории меъда дорам. Аммо ман аз дарди меъда азият намекашидам ва шикояте надоштам», - гуфта буд овозхон.

Дар Telegram, Facebook, Instagram, OK ва ВК бо мо бимонед.