Гурӯҳи террористии “Толибон” (фаъолияташ дар як қатор кишварҳо манъшуда) дастрасӣ ба интернетро барои сокинони вилояти Панҷшер қатъ намуданд, иттилоъ медиҳад РИА Новости бо истинод ба хабаргузории Raha Press.

Ба ин тариқ, Raha Press ишора мекунад, ки симкортҳои операторони «SIM» ва «Etisalat» дар Панҷшер аз кор мондаанд. Дар водии Панҷшер алоқа қатъ шуд, то ки тавре пешбинӣ мешавад, ноиби раисҷумҳур Амруллоҳ Солеҳ, ки худро иҷрокунандаи вазифаи президент номид, ба Twitter хабар фиристода натавонад.

Бино ба иттилои хабаргузорӣ, ӯ айни замон маҳз дар ҳамон ҷо қарор дорад.

Қаблан дар саҳифаи худ дар Twitter ноиби раисҷумҳури Афғонистон навишт, ки дар бораи робитаҳо байни бахши Давлати исломии “Хуросон”, ҳаракати “Толибон” ва “Шабакаи Ҳаққонӣ” далелҳо мавҷуданд. Солеҳ иҷрокунандагони амали террористиро дар назди дарвозаи фурудгоҳи Кобул низ ба толибон нисбат дод.

Ҳамсуҳбати ТАСС гуфтааст, интернети мобилӣ қисман қатъ шуда, лекин минтақа ба низоми умумимилии телекоммуникатсионӣ пайваст нест.

“Вазъи гуманитарӣ дар Панҷшер алҳол босубот буда, лекин толибон талош доранд, ки онро ба таври назаррас бад кунанд. Онҳо ҷиҳати дастрасӣ ба низоми интиқоли барқ монеъа эҷод мекунанд, ҳарчанд ин ҷо ба туфайли дарёҳои маҳаллӣ барқ кофӣ аст”, - илова намудааст манбаи хабаргузорӣ.

Ба гуфтаи ӯ, толибон давра ба давра роҳҳо ба самти минтақаро мебанданд ва изҳори нигаронӣ кардааст, ки ҷангиён интиқоли маҳсулоти сӯзишвориро бозмедоранд.

Рӯзи 15 август толибон Кобулро тасарруф намуда, аз поёни ҷанг ва пурра зери назораташон гузаштани Афғонистон хабар доданд. Сарвари давлат Ашраф Ғанӣ аз кишвар фирор намуд. Муовини ӯ Амруллоҳ Солеҳ худро президенти Афғонистон эълон карда, даъват намуд, ки зидди толибон мебояд ҷанг кард.

Айни замон водии Панҷшер ягона минтақаест дар Афғонистон, ки толибон ба он ворид нашудаанд.

Ҷабҳаи муқовиматро дар Панҷшер Аҳмад Масъуд роҳбарӣ карда, рӯзи 22 август ӯ эълом дошт, ки вилоятро ба дасти Толибон намесупорад.

Ҳар он чи дар Афғонистон рух медиҳад, метавонед мустақиман дар сужаи мо -  "Афғонистон" бихонед.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.