Шартнома байни Тоҷикистон ва Туркманистон оид ба шарикии стратегӣ имрӯз 2 ноябр аз рӯи натиҷаҳои гуфтушуниди сарони кишварҳо Эмомалӣ Раҳмон ва Гурбонгулӣ Бердимуҳаммадов дар Душанбе ба имзо расид.

Ҳамин тариқ, Туркманистон чорумин кишварест, ки Тоҷикистон бо он Шартномаи шарикии стратегӣ дорад. Қаблан бо Русияву Чин ва Қазоқистон низ чунин шартномаҳо ба имзо расида буданд.

Бино ба иттилои хадамоти матбуоти сарвари давлат, пас аз анҷоми мулоқоту музокироти расмии ҷонибҳо, ки дар доираи сафари расмии президенти Туркманистон ба Тоҷикистон сурат гирифт, дар маҷмӯъ миёни кишварҳо дар самтҳои гуногун 13 санади нави ҳамкорӣ ба имзо расид.

Аз ҷумла, оид ба эътирофи мутақобилаи ҳуҷҷатҳо оид ба таҳсилот, оид ба ҳамкориҳои дарозмуҳлати тиҷоратию иқтисодӣ, ҳамкорӣ дар соҳаи кишоварзӣ, ҳамкорӣ дар соҳаи мудофиаи гражданӣ, пешгирӣ ва рафъи ҳолатҳои фавқулода, ҳамкорӣ дар соҳаи фарҳанг ва санъат барои солҳои 2018 -2020 ва ғайра созишномаҳои байниҳукуматӣ ба имзо расиданд.

Ғайр аз ин, дар бораи ворид намудани тағйиру иловаҳо ба Созишнома байни ҳукумати Тоҷикистон ва ҳукумати Туркманистон оид ба сохтмони бинои (маҷмӯи биноҳои) мактаби миёнаи таҳсилоти умумии ба номи Махтумкулӣ дар иттиҳодияи деҳқонии “Эргаш Султонов”- и ноҳияи Дӯстии вилояти Хатлон протокол ба имзо расид.

Раисони пойтахтҳои кишварҳо Рустами Эмомалӣ ва Шомуҳаммад Дурдалиев дар бораи барпо намудани муносибатҳои бародаршаҳрӣ байни шаҳрҳои Душанбе ва Ашқобод Созишнома ба имзо расониданд.