Президенти амалкунандаи ҷумҳурӣ дар Анҷумани ХХII Иттифоқҳои касабаи мустақили Тоҷикистон - Федератсияи иттифоқҳои мустақили Тоҷикистон номзад ба мансаби президентӣ пешбарӣ шуд.

Дар шаҳри Душанбе рӯзи 26 август анҷумани навбатии Федератсияи иттифоқҳои касабаи мустақили Тоҷикистон доир гардида, дар он президенти амалкунандаи кишвар Эмомалӣ Раҳмон бори навбатӣ номзад пешбарӣ шуд.

Бино ба иттилои АМИТ “Ховар”, дар анҷуман аз фаъолияти Федератсия дар давраи солҳои 2013-2020 натиҷагирӣ шуда, вакилони Анҷуман лоиҳаи Оиннома, Барномаи амал барои солҳои 2020-2027, сохтор, мақомот, аъзоёни Шӯрои генералӣ, Комиссияи назоратӣ-тафтишотии Федератсияро тасдиқ намуданд.

Ба ин тариқ, аз 7 ҳизби сиёсии Тоҷикистон то ин дам 4-тоаш - Ҳизби аграрӣ (пешвои ҳизб Рустам Латифзода), Ҳизби сотсиалистӣ (раиси ҳизб Абдуҳалим Ғаффоров), Ҳизби демократ (раиси ҳизб Саидҷаъфар Усмонзода), ҲИИТ (раиси ҳизб Рустам Раҳматзода) ва Федератсияи иттифоқҳои касабаи мустақили Тоҷикистон номзадҳояшонро ба мансаби президентӣ дар интихоботи моҳи октябр пешбарӣ намуданд.

Дар назар аст, ки Ҳизби коммунист ва Ҳизби халқии демократии Тоҷикистон низ аввали моҳи сентябр номзадҳои худро ба мансаби президентӣ дар интихобот пешбарӣ мекунанд.

Дар ҳамин ҳол, раиси Ҳизби сотсиал-демократии Тоҷикистон (ҲСДТ) Раҳматилло Зойиров изҳор дошт, ки номзадиашро ба мансаби президент пешбарӣ намекунад. Ӯ изҳори умедворӣ намуд, ки шӯрои сиёсии ҳизб ба интихобот таҳрим (бойкот) эълон мекунад.

Ёдрас мекунем, ки интихоботи навбатии президенти Тоҷикистон ба рӯзи 11 октябри соли равон таъин шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.