Имрӯз, 18 октябр дар шаҳри Душанбе Эмомалӣ Раҳмон, Президенти Тоҷикистон дар ҳошияи конфронси байналмилалӣ таҳти унвони “Ҳамкории байналмилалӣ ва минтақавӣ оид ба амният ва мудирияти сарҳад ҷиҳати муқовимат ба терроризм ва пешгирӣ аз ҳаракати террористҳо” бо Станислав Зас,  Дабири кулли Созмони Аҳдномаи амнияти дастҷамъӣ (СААД) мулоқот кард. Дар ин бора хадамоти матбуоти Президенти ҶТ хабар медиҳад.

Гуфта мешавад, дар рафти мулоқот масъалаҳои ҳамкории Тоҷикистон дар чаҳорчуби СААД, вазифаҳои имрӯзаи Созмон, инчунин мавзуъҳои мубрами рӯзномаи минтақавӣ ва байналмилалӣ баррасӣ гардиданд.

“Ҷонибҳо зимни мулоқот оид ба вазъи душвори низомиву сиёсӣ дар минтақа ва ҷаҳон табодули андеша намуда, мустаҳкам кардани иқтидори ҳифзи сарҳади байни Тоҷикистону Афғонистонро зарур шумурданд,” – афзудааст манбаъ.

Дар вохӯрӣ инчунин дигар масъалаҳои ҷорӣ, аз ҷумла омодагӣ ба баргузории мулоқоти навбатии сарони давлатҳои аъзои СААД, муҳокима карда шуд.

Дар Telegram, Facebook, Instagram, OK ва ВК бо мо бимонед.