Журналисти тоҷик Абдуқайюми Қаюмзод, ки ба иллати бемории дил ва роҳҳои нафаскашӣ дар шуъбаи эҳёгарӣ қарор дошт, аз бемористон рухсатӣ шуд.

Тавре ба ОИ «Азия-Плюс» табиби журналист Шедфар Самадов хабар дод, айни замон вазъи солимии Қаюмзод хубтар буда, ӯро лозим аст, ки чанд муддати дигар реҷаи бистариро риоя намояд. «Мо ба ӯ истеъхмоли ҳабҳои заруриро тавсия додем», - иброз дошт ӯ.

Ёдрас мекунем, ки субҳи рӯзи 19-уми феврал журналисти тоҷик Абдуқаюми Қаюмзод ба иллати бемории дил ва мушкил шудани нафаскашӣ дар шуъбаи эҳёгарӣ (реаниматсионӣ)-и Маркази миллии тиббӣ (Қарияи Боло) бистарӣ шуд.

Қобили зикр аст, ки соли 2012 Абдуқаюми Қаюмзод ба Ҷоизаи ба номи Абулқосим Лоҳутӣ шарафёб гардид. Худи ҳамон сол хафтаномаҳои «Фараж» ва «Нигоҳ» ӯро журанлистон беҳтарини сол эълон карданд. Соли 1995 ӯ бо ҷоизаи Хеллман ва Хеммет барои ҷонибдорӣ ба озодии баён ва соли 2010 дар чорабиниии сафоратхонаи ИМА дар Душанбе ба мукофоти «Барои ҷасорати журналистӣ» сазовор дониста шуд. Миёни хонандагон ӯ бо мусоҳибаҳои пурмуҳтавояш бо афроди шинохтаи ҷомеаи Тоҷикистон маъруф аст.