Шурӯъ аз имрӯз, 29 июн то 5 июли соли 2021 тамоми кӯдакони то шашсола дар доираи даври навбатии Рӯзҳои иммунизатсияи иловагӣ бар зидди бемории фалаҷ (полиомиелит) дар Тоҷикистон бояд вояи дуюми ваксинаи зидди фалаҷро қабул мекунанд.

Бино ба иттилои маркази матбуоти Вазорати тандурустии ҷумҳурӣ, танҳо иммунизатсияи пурра бо тамоми вояҳои тавсиядодашудаи ваксина метавонад кӯдаконро аз фалаҷ ва оризаҳои хатарноки он, аз қабили фалаҷи шадид эмин дорад.

Волидон ва парасторони кӯдакони пас аз 1 январи соли 2016 таваллудшуда даъватномаро аз тарафи табиби оилавӣ ё мутахассисони соҳаи тандурустии муассисаи тиббии наздиктаринашон мегиранд. Барои сокинони ноҳияҳои дурдаст (60 км дуртар аз муассисаи тиббии наздиктарин) бригадаҳои иммунизатсионии сайёр низ хизматрасонии иммунизатсиониро мерасонанд.

Барои нафароне, ки берун аз ҷои истиқомати маъмулиашон воқеъанд, ваксина метавонад дар маҳалли буду боши кунунӣ дастрас бошад. Мо волидон ва парасторонро даъват менамоем, ки қабул намудани иммунизатсияи кӯдаконашонро дар ҳар як давр пайгирӣ намоянд, хусусан агар онҳо ваксинаи якумро нагирифта бошанд.

Бинобар кӯшишу талошҳои муштараки Ҳукумати мамлакат, шарикони рушд ва садоқати бепоёни мутахассисони соҳаи тандурустӣ, дар даври якуми маърака зиёда аз 1 миллиону 200 ҳазор кӯдакон бо ваксинаи зидди бемории фалаҷ фаро гирифта шуданд.

Чорабинии иммунизатсионӣ таҳти роҳбарии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо дастгирии Созмони умумиҷаҳонии тандурустӣ, Хазинаи кӯдакони Созмони Милали Муттаҳид (ЮНИСЕФ) ва шарикони соҳаи тандурустӣ дар доираи Ташаббуси глобалӣ оид ба маҳви бемории фалаҷ амалӣ мегардад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.