Ширкати ҳавопаймоии “Сомон Эйр” аз аввали моҳи август парвозҳоро дар масири Хуҷанд-Маскав-Хуҷанд оғоз мекунад. Дар ин бора дар хабарномаи матбуотии ширкати ҳавопаймоии «Сомон Эйр» иттилоъ дода мешавад.
Гуфта мешавад, ки аввалин парвоз аз Хуҷанд ба фурудгоҳи Внуковои Маскав ва бозгашт рӯзи 1 август дар назар аст. Парвозҳои минбаъда рӯзҳои душанбе ва панҷшанбе анҷом дода мешаванд.
Илова бар ин, ширкати ҳавопаймоӣ парвозҳоро дар хатсайрҳои "Хуҷанд - Сургут - Хуҷанд", "Душанбе - Самара - Душанбе", "Душанбе - Екатеринбург - Душанбе", "Душанбе - Новосибирск - Душанбе" ва "Душанбе — Мюнхен — Душанбе" то ду маротиба дар як ҳафта афзоиш медиҳад.
Аз ҷумла, ҳавопаймоҳои ширкати "Сомон Эйр" парвозро аз Хуҷанд ба Сургут аз 1 август оғоз намуда, рӯзҳои душанбе ва панҷшанбе парвоз хоҳанд кард.
Аз 2 август бошад парвозҳо аз Душанбе ба Самара оғоз гардида, онҳо рӯзҳои сешанбе ва шанбе сурат мегиранд.
Ширкати ҳавопаймоӣ аз 5 август рӯзҳои ҷумъа ва якшанбе парвозҳоро аз Душанбе ба Екатеринбург анҷом медиҳад. Ва аз Душанбе ба Новосибирск — аз 6 август — рӯзҳои чоршанбе ва шанбе анҷом хоҳад дод.
Аз нимаи дуюми моҳи август аз шаҳри Душанбе ба Мюнхен рӯзҳои душанбе ва ҷумъа парвоз кардан мумкин аст.
Ҳамчунин, аз 3 август ширкати ҳавопаймоии "Сомон Эйр" парвозҳоро дар хатсайри "Хуҷанд - Новосибирск - Хуҷанд" ва аз 4 август дар хатсайрҳои "Душанбе - Қазон - Душанбе" ва "Душанбе - Маскав (Жуковский) - Душанбе" аз сар мегирад.
Бояд гуфт, ки парвозҳо аз Хуҷанд ба Новосибирск ҳафтае як маротиба, рӯзҳои чоршанбе анҷом дода шуда, парвозҳо ба фурудгоҳи Қазон ва Жуковский бошад - ҳафтае як маротиба, рӯзҳои панҷшанбе ба роҳ монда мешавад.
Маълумоти муфассалро метавонед аз маркази тамоси ширкати ҳавопаймоӣ ва офисҳои фурӯш дастрас кунед.
Руcский