Андӣ Мададиён, сарояндаи маъруфи эронӣ моҳи ноябр ба Тоҷикистон меояд ва дар Душанбе консерт баргузор мекунад. Дар ин бора аз Вазорати фарҳанг ба “Азия-Плюс” хабар доданд.
Ба гуфтаи манбаъ, сарояндаи эронӣ нимаи дуюми моҳи ноябр вориди Душанбе мешавад ва рӯзи 23-юми ноябр дар Филармонияи давлатии Тоҷикистон ба номи Акашариф Ҷӯраев консерт баргузор мекунад.
Аз “Borbad Production”, ширкати масъули сафари Андӣ Мададиён ба “Азия-Плюс” гуфтанд, ки нархи билети ин консерт аз 600 то 900 сомонӣ аст.
Инчунин, тибқи иттилои масъули “Borbad Production”, пас аз ин консерт овозхони эронӣ дар тарабхонаи “Яккачинор” ҳам консерти вижа мегузаронад, вале рӯзи он ва арзиши чипта то ҳол маълум нест.
Ин бори аввал нест, ки Андӣ Мададиён ба Тоҷикистон меояд. Ин овозхон соли 2013 ҳам дар Душанбе консерт баргузор карда буд. Ин овозхон он сол меҳмони радиои “Азия-Плюс” ҳам буд.
Андӣ Мададиён кист?
Андӣ Мададиён ҳоло 66 сол дорад. Ӯ аз зумраи арманитаборони Эрон аст ва дар Теҳрон ба олам омадааст. Андӣ фаъолияти ҳунарии худро аз солҳои 70-уми асри мозӣ дар Эрон оғоз карда, солҳои 80-ум маъруфият пайдо кард.
Андӣ Мададиён пас аз Инқилоби Исломӣ дар Эрон, соли 1979 ба Иёлоти Муттаҳидаи Амрико муҳоҷир шуд ва то кунун дар Лос-Анҷелес зиндагӣ мекунад. Ин ҳиҷрат сабаб шудааст, ки овозхон оҳангҳои худро бо омезиши мусиқии Шарқу Ғарб таҳия кунад.
То кунун Андӣ Мададиён даҳҳо албоми мусиқӣ омода ва дастраси ҳаводоронаш кардааст. Ӯ ҳоло яке аз машҳуртарин сарояндагони мусиқии попи эронӣ шинохта шудааст. Овозхон асосан бо забони форсӣ месарояд, вале чандин суруд бо забонҳои англисӣ, арманӣ, арабӣ ва туркӣ низ иҷро кардааст.
Дар байни форсизабонони ҷаҳон, аз ҷумла дар Тоҷикистон, мухлисони зиёд дорад ва овозхонони тоҷик чанд сурудашро бозхонӣ ҳам кардаанд.
Ӯ нишони ситораи ҷаҳонро дорад
Андӣ Мададиён соли 2020 дар “Роҳрави фахрӣ”-и Ҳолливуд нишони “Ситора”-и ҷаҳонро ба даст овард. Ин муҳимтарин дастоварди ӯ маҳсуб мешавад.
Инчунин, ин овозхон ҷоизаи “Ҳазорсола” (Millennium)-ро дар Ҷашнвораи ҷаҳонии мусиқӣ (World Music Awards) ба даст оварда ва бо медали фахрии Эллис Айленд (Ellis Island Medal of Honor) дар Ню-Йорк қадрдонӣ шудааст.
Андӣ дар Ҷашнвораи мусиқии “Себи калон” (“Big Apple”) соҳиби ҷоизаи “Нишона” (Icon Award) ва ҷоизаи “Беҳтарин Дуэт” (Best Duet) барои ҳамкориаш бо Ла Тойя Ҷексон шудааст.
Ӯ чанд маротиба аз Ҷашнвораи мусиқии Арманистон ҷоизаи “Беҳтарин албоми байналмилалӣ” (Best International Album)-ро дарёфт кардааст.
Андӣ инчунин дар чанд филм нақш офарида, фаъолияти худро ҳамчун ҳунарпеша низ нишон додааст.
Руcский