Вазири корҳои хориҷии Тоҷикистон Сироҷиддин Муҳриддин дар чаҳорчӯби нишасти сатҳи баланди масоили амниятӣ дар қолаби С5+1 (кишварҳои Осиёи Марказӣ ва ИМА) рӯзи 21 август дар шаҳри Нур-Султони Қазоқистон бо муовини Котиби давлатии ИМА дар масъалаҳои сиёсӣ Давид М.Хейл мулоқот кард.

Бино ба иттилои Вазорати корҳои хориҷии ҷумҳурӣ, зимни вохӯрӣ ҷонибҳо вазъ ва дурнамои муносибатҳои дуҷониба ва рушди робитаҳои мутақобилан судманд, аз ҷумла дар ҳошияи созмонҳои байналмилалиро баррасӣ намуданд.

Гуфта мешавад, ҳамсуҳбатон инчунин масъалаҳои рушди минтақавӣ ва мубориза алайҳи таҳдиду чолишҳои амниятиро муҳокима карданд.

Дар шаҳри Нур-Султони Қазоқистон  Сироҷиддин Муҳриддин ҳамчунин дар нишасти сатҳи баланди масоили амниятӣ дар қолаби “С5+1” (кишварҳои Осиёи Марказӣ ва ИМА) ширкат варзид.

Сурат аз сомонаи mfa.tj

Дар чорабинии мазкур муовини  Котиби  давлатии ИМА дар масъалаҳои сиёсӣ Давид М.Хейл, Вазири корҳои хориҷии Ҷумҳурии Қазоқистон Бейбут Атамкулов, Вазири корҳои хориҷии Ҷумҳурии Қирғизистон Чингис Айдарбеков, Вазири корҳои хориҷии Туркманистон Рашид Мередов ва Вазири корҳои хориҷии Ҷумҳурии Ӯзбекистон Абдулазиз Комилов иштирок намуданд.

Ҷонибҳо перомуни кӯшишҳо барои таҳкими шарокат, дастгирии таҳавуллоти иқтисодӣ, ҳалли мушкилоти амнияти минтақавӣ ва тақвияти сулҳу субот дар минтақаи Осиёи Марказӣ табодули назар карданд.

Иштирокчиёни нишаст пуштибонии худро аз ҳамкорӣ дар чаҳорчӯби қолаби “С5+1”  таъкид карда, онро ҳамчун форуми муҳим барои муҳокима ва ҳалли муштараки мушкилоти умумӣ, таҳкими истиқолол ва тамомияти арзии кишварҳои Осиёи Марказӣ арзёбӣ намуданд.

Ҷонибҳо ҳамчунин раванди тадорукотии мулоқоти навбатии вазирони корҳои хориҷӣ дар қолаби “С5+1” ва чорабиниҳои ҷориро дар қолаби мазкур дар чаҳорчӯби гурӯҳҳои кории масоили амниятӣ, иқтисодӣ ва муҳитизистӣ   матраҳ намуданд.

Ҳамин рӯз роҳбарони ҳайатҳои кишварҳои иштирокчии нишасти “С5+1”-ро президенти Қазоқистон Қосим-Ҷомарт Тоқаев ба ҳузур пазируфт.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.