Дар рӯзҳои аввали кор дар шаҳри Қаҳрамонмаръаши Туркия наҷотдиҳандагони КҲФ Тоҷикистон ду нафарро зинда аз зери вайронаҳо берун оварданд, ки яке тифли 6-моҳа буд.

Тавре ки маркази матбуоти Кумитаи ҳолатҳои фавқулодаи ҷумҳурӣ хабар медиҳад, дар натиҷаи истифодаи дақиқи таҷҳизоти наҷот дар умқи як вайрона, зери теппаи сангу бетону хок одамони зиндаро ҳис карданд. Онҳо хеле ба зудӣ, вале эҳтиёткорона ҳама монеъаҳоро бартараф ва тифли шашмоҳаро ҳамроҳ бо падараш берун кашиданд.

Гуфта мешавад, ин ду нафар зери вайронаҳо муддати 6 рӯз зинда монда буданд. Ҳангоми наҷот ин ду нафар ба хубӣ вазъро метавонистанд ташхис кунанд. Падар бо фарзандаш ба беморхона интиқол дода шуданд.

Кадр аз навори видео

Вазири корҳои дохилии Туркия ҷаноби Сулаймон Сойлу дар ҷараёни боздидҳои худ аз шаҳри бар асари заминларза харобшудаи Қаҳрамонмаръаш ба наҷотдиҳандагони Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон  изҳори сипос намуд.

Вазири корҳои дохилии Туркия рӯзи 11-уми феврал аз минтақаҳои офатзада дидан кард ва дар ҷараёни сафари худ ба он қисмат аз шаҳр омад, ки имдодгарони КҲФ фаъолият мекарданд. Ҷаноби Сулаймон Сойлу баъди он ки ба натиҷаҳои фаъолияти имдодгарони тоҷик ошно шуд, ба онҳо изҳори сипос кард ва аз натиҷаи фаъолияташон ситоиш намуд.

Ҷаноби Сойлу ҳамчунин ба Ҳукумати Тоҷикистон барои пуштибонӣ аз офатзадагони Туркия ва ирсоли кумаки фаврӣ сипосгузорӣ намуд.

Наҷотдиҳандагони тоҷик рӯзи 12 феврал дар шаҳри Қаҳрамонмараши Туркия боз як писарбачаеро бо номи Явуз аз зери харобаҳои биноҳои фурӯрехта наҷот доданд. Дар ин бора хабаргузории Анадолу хабар медиҳад. Кӯдак беш аз 150 соатро дар зери харобаҳо сипарӣ кардааст.

Кадр аз навори видео

Одамоне, ки назди харобазор қарор доштанд, кӯдакро бо нидоҳои хурсандӣ пешвоз гирифта, зери кафкӯбии пурмавҷ ӯро ​​ба мошини ёрии таъҷилӣ гусел карданд. Ба наҷотдиҳандагони Тоҷикистонро бо нидоҳои «Тоҷикистон!» изҳори миннатдорӣ карданд.

Ҳамчунин наҷотдиҳандагони тоҷик пас аз 151 соати заминларза аз зери харобаҳои бинои 9-ошёна кӯдаки зиндамондаи 4-соларо берун гирифтанд. Амалиёт бо ёрии дастгоҳҳои махсуси ошкор кардани одамон зери вайронаҳо гузаронида шуд. Кӯдак ба бемористон интиқол дода шуд.

Мутаассифона, ҳамчунин дар ҷараёни корҳои наҷот имдодгарони Кумита аз зери вайронаҳои хонаҳои истиқоматӣ 78 ҷасадро низ берун оварданд.

Шумори қурбониёни ду заминларзаи мудҳиш дар Туркия аллакай ба ҳудуди 30 ҳазор нафар мерасад. Бино ба маълумоти Al Jazeera, дар Сурия зиёда аз 4,5 ҳазор нафар ҳалок шудаанд.

Дар Telegram, Facebook, Instagram, OK ва ВК бо мо бимонед.