Хадамоти матбуотии президенти Ӯзбекистон хабар дод, ки Шавкат Мирзиёев ҳангоми боздид аз техникаҳои низомӣ “аҳамияти истифодаи ҳавопаймоҳои бесарнишин ё худ дронҳоро зикр карда, бо мутахассисон масъалаи истеҳсоли онҳоро баррасӣ кардааст”.

Ҳамчунин Шавкат Мирзиёев ҳисоботи масъулин дар бораи корҳои анҷомшуда барои баланд бардоштани тавонмандии артиши Ӯзбекистон, омодагии ҳайати шахсӣ, идораву нигоҳдории низомҳои муосири таслиҳотӣ ва ҳавопаймоҳои бесарнишинро шунидааст.

Ба Мирзиёев ҳавопаймои бесарнишини ҷангии “Bayraktar TB2”, ки аз Туркия харидорӣ шудааст, намоиш додаанд.

Бояд гуфт, ки Ӯзбекистон ягона кишвари Осиёи Марказӣ нест, ки аз Туркия ҳавопаймои бесарнишин харидорӣ кардааст. Пештар аз ин, дар пасманзари низои марзӣ бо Тоҷикистон Қирғизистон ҳам аз харидории ҳавопаймои бесарнишини ҷангии “Bayraktar TB2” хабар дода буд.

Дар Telegram, Facebook, Instagram, OK ва ВК бо мо бимонед.