Федератсияи футболи Тоҷикистон бо натиҷагирӣ аз мусобиқоти соли 2011 футболбозони беҳтарини мамалакатро муайян кард.

Дарвози беҳтарини Тоҷикистон дар соли 2011 дарвозабони 35-солаи дастаи мунтахаби футболи Тоҷикистон ва тими «Истиқлол» Алишер Тӯйчиев дониста шуд, ки ба дарвозааш аз ҳама камтар ҳамагӣ 6 тӯб ворид шудааст.

Муҳофизатгари беҳтарин ва сармураббии беҳтарин насиби муҳофизатгар ва сармураббии бозикунандаи дастаи «Равшан»-и Кӯлоб Маъруф Рустамов гардид. Таҳти сарварии ӯ соли гузашта дастаи «Равшан» ба медалҳои биринҷии мусобиқоти лигаи олии мамлакат соҳиб шуд.

Унвони нимҳимоятгари беҳтарин ба нимҳимоятгари дастаи мунтахаб ва тими «Регар «ТадАЗ-и шаҳри Турсунзода Хуршед Маҳмудов сазовор дониста шуд. Ӯ ҳамчунин футболбози беҳтарини мавсими футболи соли 2011-и Тоҷикистон дониста шуд.

Ҳамлагари дастаи «Истиқлол» Юсуф Рабиев бо 32 тӯби задааш дар мусобиқоти нишонзанҳои беҳтарин ғолиб омада, ба ҷоизаи «Беҳтарин ҳамлагари соли 2011» лоиқ дониста шуд.

Соҳиби ҷойизаҳои дигари Федератсияи футболи Тоҷикистон инҳоянд: довари беҳтарин – Раҳмон Муртазоев; «Мураббии беҳтарини кӯдакон – Одил Каримов (Энергетик); беҳтарин футболбози мусобиқоти футболи хурд – Шерзод Ҷумъаев (Вавилон); беҳтарин сармураббии дастаи футболи хурд – Дамир Камалетдинов ва футболбоззани беҳтарини Тоҷикистон дар соли 2011 – Мадина Фозилова (Ласточка).