Дар Душанбе мусобиқаи шоҳмот барои дарёфти Ҷоми Пешвои миллат бо фонди ҷоизавии 100 ҳазор сомонӣ ба итмом расид. Байни шоҳмотбозони касбӣ дастаи Душанбе-1 ва дар мусобиқаи байни дӯстдорони шоҳмот дастаи вилояти Суғд ғолиб омаданд.
Мусобиқа моҳи июн дар сатҳи маҳаллӣ байни хонандагону омӯзгорони мактабҳои миёнаву олӣ ва кормандони ташкилоту муассисаҳо оғоз гардида, моҳи декабр бо иштироки дастаҳои мунтахаби минтақаҳо - 2-дастагӣ аз Душанбе ва Хатлон ва 1-дастагӣ аз вилояти Суғду ноҳияҳои тобеи марказ ва ВМКБ марҳилаи финалии мусобиқа доир гардид.
Дар мусобиқа байни шоҳмотбозони касбӣ зинаи аввалро бо касби 12 имтиёз (ғалаба дар ҳамаи 6 бозӣ) дастаи Душанбе-1, зинаи дуюму сеюмро бо касби 9-имтиёзӣ дастаҳои Душанбе-2 ва вилояти Суғд ишғол намуданд.
Дар мусобиқа миёни дӯстдорони шоҳмот ба мақоми аввал дастаи вилояти Суғд, зинаи дуюм - дастаи ноҳияҳои тобеи марказ ва Хатлолн-2 соҳиб шуданд.
Дар ҳисоби шахсӣ зинаи аввалро Аъзам Юнусов (Бохтар) ва Адиба Мақсудшоева (ВМКБ) касб намуданд.
Дабири кулли Федератсияи шоҳмоти Тоҷикистон Илҳом Юнусов қайд кард, ки созмондиҳандаи мусобиқа Кумитаи ҷавонон ва варзиши назди ҳукумати Тоҷикистон мебошад.
“Ин мусобиқаи дуюми шоҳмот барои дарёфти Ҷоми Пешвои миллат аст, - гуфт ӯ. - Аз ин ба баъд мусобиқа анъанавӣ хоҳад шуд”.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
Руcский