Раиси Ассотсиатсияи журналистони риштаи варзиши Тоҷикистон Нарзулло Латифов зимни натиҷагирӣ аз ҳунарнамоии варзишгарони тоҷик дар соли 2025, дар бораи зарурати ислоҳот дар низоми идоракунии соҳаи тарбияи ҷисмонӣ ва варзиш дар кишвар ба “Азия-Плюс” изҳори назар кард.

Ба гуфтаи Латифов, соли 2025 варзишгарони тоҷик дар як қатор мусобиқаҳои бузурги ҷаҳонӣ ширкат варзида, ба натиҷаҳои назаррас даст ёфтанд. Аз ҷумла, дар мусобиқоти қаҳрамонии ҷудо ва муштзании ҷаҳон онҳо ба сурати умум панҷ медал ба даст оварданд, ки яке аз натиҷаҳои беҳтарини варзиши ватанӣ дар мавсим мебошад.

Дар мусобиқоти қаҳрамонии ҷудои ҷаҳон моҳи июн дар Будапешт (Маҷористон) намояндагони Тоҷикистон ба дарёфти се медал: нуқра дар вазни то 66 кг (Эмомалӣ Нуралӣ), ва 2 медали биринҷӣ - дар вазни то 66 кг (Обид Ҷебов) ва вазни зиёда аз 100 кг (Темру Раҳимов) ноил гардиданд.

Боз ду медалро варзишгарони тоҷик дар мусобиқоти қаҳрамонии муштзанӣ (бокс) миёни мрадон моҳи декабр дар Дубай (АМА) ба даст оварданд. Дар вазни то 57 кг Хусравхон Раҳимов медали нуқра ва дар вазни то 60 кг Акмал Убайдов медали биринҷӣ гирифтанд.

Дар ҳамин ҳол, Латифов хотиррасон намуд, ки тайи 30 соли ахир ҳеҷ яке аз варзишгарони Тоҷикистон ба дарёфти медали тиллои мусобиқоти қаҳрамонии ҷаҳон дар навъҳои олимпии варзиш даст ёфта натавонист. Чунин дастоварди ахир соли 1995 ба қайд гирифта шуда буд, ки он замон гурзпарто Андрей Абдувалиев дар Гётеборг (Шветсия) ба унвони қаҳрамони ҷаҳон соҳиб шуд.

Дар ин робита Нарзулло Латипов доир ба як қатор пешниҳодҳо изҳори назар кард, ки ба рушди соҳаи тарбияи ҷисонӣ ва варзиш дар кишвар равона шудаанд.

Аввалан ӯ пешниҳод намуд, ки низоми амалкунандаи идоракунии соҳа аз ҷониби давлат бозбинӣ шавад ва зикр кард, ки табдили Кумитаи пешинаи тарбияи ҷисмонӣ ва варзиш ба Кумитаи кор бо ҷавонон ва варзиш ба самаранокии фаъолият, бахусус дар сатҳи шаҳру навоҳӣ, таъсири манфӣ расонид. Ба қавли ӯ, соҳаи варзиш дар Тоҷикистон ба сохтори алоҳидаи идоракунӣ ниёз дорад.

Сониян, Латипов баргардонидани шакли пешинаи кори Шӯро оид ба тарбияи ҷисмонӣ ва варзишро, ки он замон онро сарвазири Тоҷикистон роҳбарӣ мекард, мувофиқи мақсад медонад. Ӯ таъкид дошт, ки ба ҳайати Шӯро бояд роҳбарони вазоратҳои калидии вазорату идораҳои дахлдор, инчунин раисони минтақаҳо шомил бошанд.

Дар идома ӯ пешниҳод намуд, ки дар дастгоҳи марказии Вазорати маориф ва илм раёсат ё шуъбаи тарбияи ҷисмонӣ ва варзиш таъсис дода шавад. Ғайр аз ин, ба гуфтаи ӯ, дубора барқарор намудани фаъолияти қисмате аз мактабҳои варзишии кӯдакону наврасон, инчунин ба тобеъияти вазорати мазкур додани Донишкадаи тарбияи ҷисмонӣ зарур аст.

Дар робита ба масъалаи омодагӣ ба Бозиҳои олимпии соли 2028 дар Лос-Анҷелес Латифов таҳияи барномаи махсуси давлатӣ, таъмини маблағгузории кофии соҳа аз ҳисоби воситаҳои буҷет ва сарпарастон, дар фурсатҳои кӯтоҳтарин таъсис додани Маркази олимпии омодагӣ дар кишварро пешниҳод кард. 

Қобили зикр аст, ки бори аввал нест, ки Нарзулло Латифов доир ба ҷудо кардани соҳаи варзиш аз сиёсати ҷавонон изҳори назар мекунад. Моҳи феврали соли 2016 ӯ аллакай чунин пешниҳодро изҳор ва зикр карда буд, ки муттаҳид сохтани соҳаи варзиш бо сохтори ҷавонон ва сайёҳӣ ба поин рафтани мақоми соҳа ва заъиф гардидани низоми идоракунии он оварда расонид. Баъди як соли чунин изҳорот соҳаи сайёҳӣ ба сохтори алоҳида табдил дода шуд.

Дар Telegram, Facebook ва Instagram бо мо бимонед.