Душанбе. 1-уми сентябр. ОИ «Азия-Плюс» - Музди меҳнати кормандони соҳаи маориф аз 1-уми сентябр 40 дарсад зиёд карда шуд. Мувофиқи фармони президенти Тоҷикистон, музди меҳнати вазифавии кормандони соҳаи маориф зиёд карда мешаванд; музди меҳнати мудирони муассисаҳои томактабӣ ба маоши мудирони мактабҳои таҳсилоти умумӣ ва маоши мудирони муассисаҳои маълумоти ибтидоии касбӣ ба музди меҳнати мудирони макотиби таҳсилоти умумӣ баробар карда шуд.

Бино ба иттилои манбаъ, акнун музди меҳнати ҳадди ақали кормандони соҳаи маориф 60 сомониро ташкил медиҳад. Навовариҳои дигар низ ҷорӣ гаштанд: нақшаи таълимӣ иваз гардида, акнун як музди меҳнати омӯзгор 18-20 соати дарси таълимӣ муқаррар гаштааст.

Сарчашма зикр кард, ки музди меҳнати омӯзгорон ҳамчунин аз маълумот ва дараҷаи касбӣ вобаста аст. Ғайр аз ин, маоши мансабии мудирони муассисаҳои таълимии ғайримактабӣ ба музди меҳнати мудирони мактабҳои таҳсилоти умумии шумораи хонандагонаш то 400 нафар баробар карда мешавад.