Душанбе. 3-юми сентябр. ОИ «Азия-Плюс» - Медиа-холдинги Tajinfo , ки дар Русия сабти ном шудааст, ба ҳаводорон ва таҳқиқгарони ҳаёту эҷодиёти асосгузори сардафтари адабиёти классикии форсу тоҷик Абӯабдулло Рӯдакӣ маҷмӯаи иборат аз мақолаҳо ва андешаҳо оид ба шоир бо номи «Мероси Рӯдакӣ» тақдим кард.

Роҳбари медиа-холдинг Муҳаммади Эгамзод ба ОИ «Азия-Плюс» хабар дод, ки дар маҷмӯа маводу гузоришҳои Конфронси байнулмилалии илмӣ бахшида ба 1150-умин солгарди Абӯабдулло Рӯдакӣ дар шаҳри Маскав гирд оварда шудаанд.

Қобили зикр аст, ки конфронси мазкур аз ҷониби сафорати Тоҷикистон дар Русия дар ҳамдастӣ бо Иттиҳодияи байнулмилалии иттифоқҳои нависандагон, Донишкадаи шарқшиносии Академияи улуми Русия ва созмони ҷамъиятии умумирусиягии «Иттиҳоди тоҷикистониёни Русия» созмон дода шуда буд.