Душанбе. 14-уми май. ОИ «Азия-Плюс» - То имрӯз хоҷагиҳои деҳқонии кишвар аз 140 млн. сомонӣ маблағи ҷудокардаи ҳукумат барои рушди соҳаи пахтакорӣ 64 млн. 130 ҳазор сомониашро ба бонкҳо пардохт намуданд.

Чӣ тавре ки ба ОИ «Азия-Плюс» сардори раёсати иқтисод ва ояндабинии Вазорати кишоварзии ҶТ Сафар Маҳмадиев иттилоъ дод, айни замон ба «Амонатбонк» аз 40 млн. сомонии маблағи қарз 19 млн. сомонӣ, ба Агроинвестбонк» аз 50 млн. сомонӣ - 18,7 млн. сомонӣ, ба «Ориёнбонк» аз 35 млн. сомонӣ - 15 млн. сомонӣ, ба «Тоҷпромбонк» аз 5 млн. сомонӣ - беш аз 2 млн. сомонӣ ва «Бонки рушди Тоҷикистон аз 5 млн. сомонии маблағи қарзи соли гузашта беш аз 3,5 млн. сомонӣ маблағи қарзҳо пардохта шудаанд. «Маблағи қарзи аз ҷониби «Тоҷиксодиротбонк» ба хоҷагиҳои пахтакор додашуда дар ҳаҷми пурра баргардонида шудааст», - афзуд Маҳмадиев.