Душанбе. 18-уми май. ОИ «Азия-Плюс» - Имрӯз намояндагони палатаи болоии парулмони ҷумҳурӣ Қонуни ҶТ «Дар бораи ворид намудани тағйироту иловаҳо ба Қонуни ҶТ «Дар бораи мақоми пойтахт»-ро маъқул шумориданд, ки тибқи он, аз ин ба баъд нигаҳдории чорвои хонагӣ ва мурғ (ба ҷуз булбул, тӯтӣ, бедона ва ғ.) дар қаламрави шаҳри Душанбе манъ карда мешавад.

Аъзои ММ МО ҶТ Маҳкам Маҳмудов изҳор дошт, ки ибтикори мазкур ба ҷавобгӯ будани пойтахт ба талаботи санитарӣ ва эпидемиологӣ равона гардидааст. «Минбаъд ҷойи нигаҳдории чорво барои хариду фурӯш дар шаҳри Душанбе бо мақомоти иҷроияи маҳаллӣ мувофиқа карда мешавад», - гуфт ӯ.

Зимни суханронии худ раиси палатаи болоии парлумони кишвар, раиси шаҳри Душанбе Маҳмадсаид Убайдулллоев гуфт, пойтахти як кишваре ҷойи парвариши чорво буда наметавонад. «Тайи чанд соли ахир миқдори саршумори чорвои хонагии шаҳри Душанбе аз баъзе ноҳияҳои пешқадами кишоварзӣ зиёдтар шудааст», - афзуд раиси пойтахт.