Душанбе. 20-уми май. ОИ «Азия-Плюс» - Рӯзи 18-уми май дар шаҳри Душанбе аз ҷониби раиси Кумитаи кор бо ҷавонон, варзиш ва сайёҳии назди ҳкумати ҶТ Маликшо Неъматов ва раиси Шӯрои миллии ҷавонони Эрон ва дар як вақт ноиби президенти ин кишвар Ҳоҷӣ Алии Акбарӣ миёни ҳукумати Тоҷикистон ва Эрон оид ба ҳамкорӣ дар бахши сиёсати ҷавонон Ёддошти ҳамкорӣ ба имзо расид.

Чӣ тавре ки ба ОИ «Азия-Плюс» аз Кумитаи кор бо ҷавонон, варзиш ва сайёҳии назди ҳукумати ҶТ иттилоъ доданд, дар чаҳорчӯбаи асноди баимзорасида густариши ҳамкорӣ дар бахши сиёсати ҷавонон пешбинӣ гардида, барои таҳияи нақшаи корӣ аз рӯи чорабиниҳои Ёддошт гурӯҳи кории дуҷониба таъсис дода шудааст. «Дар вохӯрии ҷонибҳо инчунин муовини аввали раиси кумита Кабирҷон Ҷӯраев ва муовини раиси Иттифоқи ҷавонони ҶТ Рустами Эмомалӣ низ ширкат варзиданд», - гуфт манбаъ.

Бино ба иттилои манбаъ, рӯзи 18-уми май ҳайати Эрон бо олимони ҷавони Тоҷикистон мулоқот барпо кард, ки дар он сафири Эрон дар Тоҷикистон Алиасғари Шеърдӯст ва зиёда аз 100 олими ҷавон ширкат варзиданд.