Душанбе. 22-юми май. ОИ «Азия-Плюс» - Бо дастгирии Кумитаи байнулмилалии Салиби Сурх (КБСС) 13 нафар афсарони Ситоди кулли Вазорати мудофиа воситаҳои ҳамгиройии ҳуқуқи байнулмилалии гуманитарӣ ба доктринаҳои ҳарбиро омӯхтанд.

Чӣ тавре ки ба ОИ «Азия-Плюс» аз КБСС бо такя ба гуфтаҳои вакили КБСС оид ба ҳамкорӣ бо нерӯҳои мусаллаҳ ва амнияти кишварҳои минтақаи Осиёи марказӣ Жорж Без иттилоъ доданд, семинар рӯзҳои 19-21-уми май доир гардида, аз нигоҳи омӯзиши раванди ҷорисозии ҷанбаҳои ҳуқуқи байнулмилалии гуманитарӣ зимни қабули қарор барои афсарон хеле муфиду муҳим буд.

Ба иттилои манбаъ, дар зарфи се рӯз ба афсарон роҷеъ ба масоили ҳуқуқи байнулмилалии гуманитарӣ маърӯзаҳо пешкаш гардида, ба онҳо оид ба усулҳои байнулмилалӣ, истифодаи нишонаву тамғаҳо, ҳисси масъулият доштани фармондеҳон зимни қабули қарор, ҳифзи аҳолӣ ва дигар масоили марбут ба ҳуқуқи байнулмилалии гуманитарӣ маълумоти муфассал пешниҳод гардид.