Душанбе. 22-юми май. ОИ «Азия-Плюс» - Намояндагии доимии Бонки ҷаҳонӣ дар Тоҷикистон ғолибони бурсҳои Барномаи рушди ҷомеаи шаҳрвандӣ дар соли 2009-ро эълом дошт. Дар чаҳорчӯбаи ин барнома ба панҷ созмони ҷамъиятӣ аз ҷониби Бонки ҷаҳонӣ бурсҳо ҷудо карда мешаванд.

            Чӣ тавре ки ба ОИ «Азия-Плюс» аз намояндагии доимии БҶ дар ҶТ иттилоъ доданд, мавзӯи асосии Барномаи рушди ҷомеаи шаҳрвандӣ дар Тоҷикистон ба иштироки ҷавонон дар ҳаёти ҷамъиятии кишвар бахшида шудааст. «Барои соҳиб шудан ба бурсҳо 63 созмони маҳаллии ҷамъиятӣ лоиҳаҳои худро пешниҳод карданд, ки аз онҳо комиссия 5-тоашро интихоб намуд ва ба ғолибон баҳри амалисозии лоиҳаи пешниҳодкардаашон аз 5 то 10 ҳазор доллари ИМА маблағҳои бурсӣ ҷудо гардида, ҳаҷми умумии он 45 ҳазор доллари ИМА-ро ташкил дод», - гуфт манбаъ.

            Ба иттилои сарчашма, дар Тоҷикистон созмони ҷамъиятии «Академияи мухобироти оммавӣ», иттиҳодияи ҷамъиятии (ИҶ) «Маркази фанновариҳои иттилоотӣ ва телекоммуникатсионӣ», Маркази тоҷикистонии дастгирии ҳуқуқӣ ва иҷтимоии занон ва ҷавонони «Фемида», ИҶ «ШОТО» ва ИҶ «Маркази ташбаббускори ҷавонони «Тараққиёт» соҳиби маблағҳои бурсӣ гардиданд.