Душанбе. 23-юми май. ОИ «Азия-Плюс» - Дар шаҳри Душанбе кормандони милиса як пинҳонгоҳи бузурги аслиҳаи оташфишонро ошкор сохтанд.

            Чӣ тавре ки ба ОИ «Азия-Плюс» аз Вазорати умури дохилии ҶТ иттилоъ доданд, чанде пештар дар манзили зисти хусусие дар пойтахт пинҳонгоҳе ошкор карда шуд, ки аз он 5 адад автомати Калашников, 1 норинҷакафкан бо 27 дона тир, 12 тирдон, 2 норинҷак бо таҷҳизоти тарканда ва 763 дона муҳимоти гуногун дарёфт ва мусодира гардид.

            Ба иттилои манбаъ, ҳамон рӯз дар ноҳияи Ховалинги вилояти Хатлон зимни азназаргузаронии боғи ба иҷора гирифтаи шаҳрванд Х.Р. 1 автомати Калашников бо 4 адад тирдон ва тирҳои андозаи 7,62 мм дарёфт ва мусодира карда шуд.

            Мувофиқи маълумоти фаврии вазорат, шурӯъ аз оғози сол кормандони мақомоти милисаи кишвар 501 адад силоҳи оташфишон, аз ҷумла 124 адад автомати Калашников, 56 адад туфангча, 93 адад силоҳи дигари бурранда ва 56 адад норинҷакафкан дарёфт ва мусодира карданд.