Душанбе. 21-уми июл. ОИ «Азия-Плюс» - Намояндаи мардумӣ дар парлумони ҷумҳурӣ, раиси Ҳизби коммунисти Тоҷикистон Шодӣ Шабдолов бар ин назар аст, ки бекор кардани мақоми забони русӣ ҳамчун забони муоширати байнулмилалӣ дар лоиҳаи нави Қонуни ҶТ «Дар бораи забони давлатии ҶТ» иштибоҳи ҷиддӣ аст. «Дар лоиҳаи нави қонун мақоми забони русӣ аз ҷиҳати сиёсӣ, маърифати ва илмӣ ба таври бояду шояд ба эътибор гирифта нашудааст», - гуфт ӯ.

            Ба гуфтаи Шабдолов, дар қаламрави кишварҳои узви ИДМ забони русӣ чун забони муоширати байнулмилалӣ эътироф шудааст ва дар қонунгузории кишвар мо наметавонем онро нодида гирем. «Гузашта аз ин, мебояд онро ҳам ба назар гирфт, ки забони русӣ яке аз забонҳои расмии СММ маҳсуб мегардад», - иброз медорад ӯ.

            Мавсуф зикр кард, ки «ҳамаи шаҳрвандони Тоҷикистон бояд забони давлатиро донанд ва ин амри табииву қонунӣ аст, вале маънои онро надорад, ки забони русӣ ҳамчун забони муоширати байнулмилалӣ дар ҶТ бекор карда шавад. «Албатта, мо бояд ба забони модарии хеш эҳтиром гузорем, вале бо як забони тоҷикӣ мо ҷое рафта наметавонем», - афзуд Шабдолов.