Дар пайи фирори як маҳбус аз Боздоштгоҳи рақами 1-и шаҳри Душанбе, як мақомдори Боздоштгоҳро ба ҳабс гирифтаанд. Мақомот қазияро ба таври расмӣ шарҳ намедиҳанд. Манобеи Радиои Озодӣ гуфтанд, Аҳмадбек Саидови 35-сола шаби 18 ба 19-уми августи имсол гурехтааст.
Як манбаъ дар ниҳодҳои қудратӣ рӯзи 29-уми август ба Радиои Озодӣ гуфт, “субҳи 19-уми август хабар доданд, ки як нафар аз боздоштгоҳ фирор кардааст. Ҳамин қадар гуфтанд, ки эҳтиёт кунед, тамом.”
Кӯшишҳои мо барои гирифтани шарҳи мақомот то ин дам бенатиҷа буд. Илҳом Маҳмудов, муовини раиси Идораи зиндонҳои Тоҷикистон, баъд аз шунидани суол гӯширо гузошт.
Маълум нест, маҳбуси фирориро дубора дастгир кардаанд ё не, вале аксҳояшро дар кӯчаву бозорҳои маркази Хатлон насб карда, аз сокинон дар борааш мепурсанд.
Аҳмадбек Саидов дар оғози моҳи августи имсол дар қатори дувоздаҳ каси дигар аз Русия ба Тоҷикистон истирдод шуда, ба “ҳамлаи ғоратгарона ва тасарруфи 86 ҳазору 250 сомонӣ дар соли 2007 дар Данғара” муттаҳам аст. Вай аз ҷамоати Тоҷикободи ноҳияи Вахш аст ва ҷустуҷӯ низ асосан дар маҳалли зисташ ва минтақаҳои атрофи он ба роҳ монда шудааст.
Дар ҳамин ҳол, манобеи Радиои Озодӣ мегӯянд, Идибек Муҳтоҷов, як мақомдори Боздоштгоҳи рақами 1-и Душанбе ба иттиҳоми даст доштан дар фирори маҳбус дастгир шудааст.
"Таҳқиқ нишон додааст, ки ин маҳбус як рӯз пеш бо телефони Муҳтоҷов бо касе суҳбат кардааст. Аз ин рӯ, як ҳафта боз дар боздошт аст ва бозпурсӣ мешавад," – афзуд ӯ. Мақомот расман дар ин бора иттилоъ намедиҳанд.
Ҳодисаи фирори маҳбусон аз боздоштгоҳҳо дар Тоҷикистон нав нест. Мавриди пурсарусадотарин, ки бо барканории раиси вақти Кумитаи давлатии амнияти миллӣ Хайриддин Абдураҳимов ва тақрибан ҳамаи муовинони ӯ анҷом ёфт, фирори 25 маҳбус аз боздоштгоҳи ин кумита дар Душанбе дар моҳи августи соли 2010 буд.
Амалиёти таъқиби маҳбусони фирорӣ то боздошти охирин нафари онҳо дар умум 1 солу 3 моҳ дароз кашид. Дар ҷараёни ин амалиёт, ба ҳисоби мақомот, 14 кас дастгир ва 7 нафар кушта шудаанд. Се шаҳрванди Афғонистон Маҳмадамир валади Қурбоналӣ, Муҳаммадвалӣ валади Тозагул ва Муҳаммадзокир валади Муҳаммадҳалим ҳарчанд дар вилояти Тахори Афғонистон боздошт шуданд, Кобул онҳоро ба Душанбе насупурд.
Дар соли 2016 низ чанд маҳбус аз зиндоне дар шаҳри Хуҷанд фирор карданд. Қисме аз онҳо дубора дастгир ва баъзеи дигар ҳангоми амалиёт кушта шуданд.
Имзои шартномаҳо байни соҳибкорони Тоҷикистону Италия ба маблағи зиёда аз 160 млн доллар
Соли 2050 аҳолии Осиёи Марказӣ аз 100 млн нафар зиёд мешавад. Моро чӣ интизор аст?
“Мехост ҷавонро аз хидмат озод кунад”. Боздошти муовини раиси Шаҳритус барои 5 ҳазор сомонӣ пора
Иброҳим Раисӣ гуфт, агар Исроил дубора ба Эрон ҳамла кунад, ин кишварро ба хок яксон мекунад
Оғози “Ҳафтаи соҳибкории иҷтимоӣ” дар Тоҷикистон
Ғалабаи таърихӣ! Мунтахаби футзали Тоҷикистон бори аввал ба Ҷоми ҷаҳон роҳ ёфт
Ҷасади як ҷавонро аз Кӯли ҷавонон берун гирифтанд
“Болои сӯхта - намакоб”. Низоми раводид миёни Тоҷикистону Туркия садди роҳи табобати Умриузоқ шудааст
Интиқом барои интиқод? Толибон хонаи Зоҳири Ағбар ва Абдулрашид Дӯстумро дар Кобул тасарруф кардаанд
Рамазон Раҳимзода гуфт, баъзе ҷинояткорон дар Италия бо баҳонаи "гуреза" пинҳон шудаанд
Кулли ахбор
Авторизуйтесь, пожалуйста