Дирӯз, 5 –уми октябр, дар Суди ноҳияи Файзобод мурофиаи нахустини Бибикалон Назирова, хушдомани Манораи Абдуфаттоҳ, ки ҷасадаш моҳи июни соли гузашта дар ноҳияи Файзобод бо 26 зарби корд ёфт шуд, оғоз гардид. Дар ин бора Абдуфаттоҳ Мисоқов, падари Манора ба “Азия-Плюс” хабар дод.

Гуфта мешавад, ки Назирова, 3-юми сентябри соли равон аз ҷониби мақомоти қудратии ноҳияи Файзобод дастгир ва рӯзи 6-уми сентябр барои ба худкушӣ расондани келинаш (моддаи 109 қисми 2)  ба ҳабси пешакӣ гирифта шуд.

Мисоқов гуфт, мурофиа, ки мебоист соати 9:00-и 5-уми октябр баргузор мешуд, бо сабабҳои номаълум соати 11:00 оғоз ёфт ва он ҳам бо баҳонаи наомадани айбдоркунандаи давлатӣ ба рӯзи сешанбеи 11 –уми октябр мавқуф гузошта шуд.

Ӯ гуфт, ба адолати судӣ бовар дорад ва умедвор аст, ки гунаҳкорони марги духтараш ҷазои сазовор мегиранд.

“Ман бовар дорам, ки духтарамро куштаанд, вале мақомот гуфтанд, духтарам худкушӣ кардааст. Вале дар ҳолати худкушӣ ҳам бояд нафароне, ки ӯро ба худкушӣ расониданд, ҷазо гиранд. Наздикони хушдомани духтарам аллакай чанд нафарро миёнарав карда истодаанд, ки ӯро аз ҷавобгарӣ озод кунанд, вале ман ба адолати судӣ бовар дорам”, - гуфт Абдуфатоҳ Мисоқов.

Оғози мурофиаи хушдомани Манораи Абдуфаттоҳ барои ба худкушӣ расонидани келинаш дар ҳолест, ки наздикони ӯ чанд маротиба ба мақомот муроҷиат карда, хостори ҷазо додани наздикони шавҳари Манора шуда буданд. Онҳо даъво доштанд ки духтарашон худкушӣ накардааст ва наметавонист, ки худаш дар баданаш 26 корд занад.

Баъдан, Додситонии кулли кишвар пас аз тафтиши пешакӣ далели марги Манораи Абдуфаттоҳро худкушӣ номида буд.

Ин ниҳод гуфта буд, ки бо гузаронидани амалҳои зиёди тафтишотӣ ва экспертизаҳои судии гуногун, муайян карда шудааст, ки сабаби марги ҷавонзан хунравӣ аз 3 ҷароҳати халанда ва бурандаи дар мавзеи гардан ва шикам бардоштаи ӯ гаштааст.

“Захму харошаҳои дигари дар бадани Абдуалимзода М.А. бисёру бо ҳам паралел ва сатҳӣ буда, сабаби марг шуда наметавонанд ва онҳо аз тарафи худи ӯ расонида шудаанд”, - омадааст дар маълумот.

Пайвандону наздикони ҷавонзан ба худкушии ӯ бовар надоранд ва мегӯянд, ки ба гумони ғолиб, ӯро куштаанд.

Манораи Абдуфаттоҳ се фарзанд дошт ва ҳангоми рух додани ин ҳодисаи фоҷеабор шавҳари Манора дар муҳоҷират дар Русия қарор дошт. Оилаи шавҳари зани фавтида аз суҳбат бо рӯзноманигорон худдорӣ мекунанд. Ҳамчунин, додситонӣ ва суди Файзобод ҳам дар робита ба қазия то ба ҳол шарҳе надодаанд.

Дар Telegram, Facebook, Instagram, OK ва ВК бо мо бимонед.