Чанде пеш дар Бонки миллии Тоҷикистон (БМТ) дар мавзӯи “Тадбирҳои вусъат додани ҳисоббаробаркунии ғайринақдӣ бо истифода аз технологияҳои муосири пардохтӣ” мизи мудаввар баргузор гардид, ки дар кори он намояндагони ташкилотҳои қарзӣ ва ширкатҳои таҳвилгарони таҷҳизоти терминалӣ ширкат варзиданд.

Бино ба иттилои хадамоти матбуоти БМТ, дар ҷараёни кори мизи мудаввар таҳвилгарони таҷҳизоти терминалӣ ба иштирокчиёни он терминалҳои электронии ширкатҳои PAX Technology LTD, Verifone ва Ingenico-ро муаррифӣ намуданд.

Гуфта мешавад, инчунин, дар доираи чорабинии мазкур райъпурсии иштирокчиён гузаронида шуда, сабаб ва паҳлуҳои масъалаю мушкилоти татбиқи Қарори ҳукумати ҶТ “Оид ба тадбирҳои вусъат додани ҳисоббаробаркунии ғайринақдӣ тавассути кортҳои пардохтии бонкӣ”муҳокима гардиданд.

Дар робита ба ин иштирокчиёни мизи мудаввар қайд карданд, ки барои минбаъд рушд намудани пардохтҳои ғайринақдӣ дар Тоҷикистон  васеъ кардани шабакаҳои терминалӣ дар қаламравӣ ҷумҳурӣ ва дастрасии он ба аҳолӣ,  муайян кардани боҷҳои гумрукии имтиёзнок барои таҷҳизотҳои терминалии воридшаванда, муқаррар кардани андозҳои имтиёзнок барои муассисаҳои савдо ва хизматрасонӣ, ки бо истифодаи кортҳои пардохтӣ тавассути терминалҳо пардохтҳоро барои хариди мол ва хизматрасонӣ қабул мекунанд ва баланд бардоштани  дониши молиявии аҳолӣ зарур аст.

Аз ҷониби иштирокдорон қайд карда шуд, ки барои амалӣ кардани Қарори мазкур иштироки фаъоли ҳамаи тарафҳои манфиатдор, аз қабили Вазорати молия, Бонки миллии Тоҷикистон ва Кумитаи андози назди ҳукумати Тоҷикистон низ зарур мебошад.

Ҳамчунин пешниҳод гардид, ки Кумитаи телевизион ва радиои назди ҳукумати ҷумҳурӣ, Ассотсиатсияи бонкҳои Тоҷикистон ва ташкилотҳои қарзӣ бояд корҳои ташвиқотию тарғиботӣ ва фаҳмондадиҳиро оиди ба таври васеъ истифода бурдани технологияи муосири пардохтӣ тавассути воситаҳои ахбори омма ҷоннок намоянд.