Дар муқоиса бо нимсолаи аввали соли гузашта шумори вуруди сайёҳони хориҷӣ ба Тоҷикистон дар 6 моҳи соли ҷорӣ қариб 2 баробар афзуд.

Тибқи маълумоти Кумитаи ҷавонон, варзиш ва сайёҳии назди ҳукумати ҶТ, нимсолаи аввали соли равон беш аз 147 ҳазор сайёҳон аз 69 кишвари дунё аз Тоҷикистон боздид намудаанд ва ин ҳам дар ҳолест, ки давоми моҳҳои январ-июни соли 2014 ҳамагӣ ҳудуди 74 ҳазор нафар шаҳрвандони хориҷӣ бо раводидҳои сайёҳӣ ба Тоҷикистон ташриф оварда буданд.

Ба иттилои манбаъ, айни замон дар бозори сайёҳии Тоҷикистон 90 ширкат амал мекунанд, ки 60-тоашон ба корҳои ташкили сафари шаҳрвандони кишвар ба хориҷа ва 30-тоашон ба сафари сайёҳони хориҷӣ ба ҷумҳурӣ машғуланд.

Зимнан зикр гардид, ки феълан сомонаи сайёҳии «Сафари Тоҷикистон» таҳия мегардад, ки дар он бобати 25 макони беҳтарини сайёҳии Тоҷикистон тамоми маълумоти зарурӣ дарҷ меёбад ва ин саҳифаи интернетӣ то ахири моҳи равон фаъол хоҳад шуд.

Ҳамчунин қайд карда мешавад, ки айни замон дар 10 мактаби олии Тоҷикистон мутахассисони соҳаи сайёҳӣ омода карда мешаванд.