Раиси Бонки давлатии амонатгузории Тоҷикистон «Амонатбонк» Руҳулло Ҳакимзода рӯзи 14 июл дар ҷамъи рӯзноманигорон изҳор намуд, ки сохтмони бинои нави «Амонатбонк» соли 2017 ба итмом мерасад.

Ба гуфтаи ӯ, маросими оғози сохтмони бинои нави бонк бо иштироки президенти мамлакат доир гардида,  айни замон сохтмони таҳкурсии он ба анҷом расидааст. «Барои сохтмони бинои нави бонк беш аз 96 млн. сомонӣ маблағ зарур аст», - гуфт ӯ.

Руҳулло Ҳакимзода таъкид дошт, ки барои ҷалби воситаҳои қарзӣ ба сохтмони бинои нави бонк бо Бонки давлатии рушди Чин гуфтушунид ҷараён дошта, ҳамчунин бо ин мақсад харҷи воситаҳои худи бонк низ пешбинӣ шудааст. «Ба сохтмони бинои нави «Амонатбонк» корхонаҳои ватанӣ машғуланд», - афзуд номбурда.