Мақомоти марбут ба алоқаи ҳавоии Тоҷикистону Эрон оид ба афзоиши шумори парвози ҳавопаймоҳо миёни шаҳрҳои кишварҳо ба мувофиқа расиданд.

Аз Вазорати нақлиёти ҶТ ба «Азия-Плюс» дар ин робита иттилоъ доданд, ки ҳафтаи гузашта дар Теҳрон миёни мақомотҳои авиатсияи граждании Тоҷикистон ва авиатсияи граждании Эрон дар бораи ҳамкорӣ дар соҳаи нақлиёти ҳавоӣ ёддошт ба имзо расид.

Ба иттилои манбаъ, мутобиқи ин санад, акнун вобаста ба мавҷуд будани мусофирон, ҳар ҳафта миёни шаҳрҳои Тоҷикистону Эрон даҳ парвози ҳавопаймоҳо сурат мегирад.

Парвозҳои мунтазам тариқи хатсайрҳо аз ҷониби ширкатҳои ҳавопаймоии «Тоҷик Эйр» ва «Сомон Эйр»-и Тоҷикистон ва «Осмон Эйр» ва «Меҳан Эйр»-и Эрон анҷом дода мешаванд.

Бино ба маълумоти Вазорати нақлиёти ҷумҳурӣ, айни замон миёни Тоҷикистону Эрон ду хатсайри ҳавоии мунтазам амал мекунад. Рӯзи якшанбеи ҳар ҳафта ширкати «Тоҷик Эйр» парвоз тариқи хатсайри Душанбе - Теҳрон - Душанбе ва рӯзи панҷшанбеи ҳар ҳафта ширкати «Осмон Эйр» парвоз тавассути хатсайри Машҳад - Душанбе - Машҳадро ба иҷро мерасонанд.