Дар мулоқоти роҳбарияти Бонки миллии Тоҷикистон (БМТ) бо ҳайати намояндагии Бонки ҷаҳонӣ таҳти сарварии сариқтисодчии Идораи минтақавии Бонки ҷаҳонӣ оид ба Аврупо ва Осиёи марказӣ Ханс Тиммер шарҳи рушди иқтисодӣ дар Аврупо ва Осиёи марказӣ, ноустувории болоравии иқтисодӣ дар ин минтақаҳо ва дурнамои таҳкими ҳамкориҳои дуҷонибаи ин ташкилоти молиявӣ бо Бонки миллӣ муҳокима гардиданд.

Бино ба иттилои хадамоти матбуоти БМТ, дар ҷараёни суҳбат ҷонибҳо оид ба таҳлили нархҳои нефт, қурбҳои воқеӣи мубодилавӣ, зарурияти мутобиқ шудан ба воқеияти нави нархҳои пасти нефт ва таъмини чораҳои мақсаднок барои дастгирии ичтимоии аҳолӣ мубодилаи афкор намуданд.

Дар робита ба ин мавзуъ муовини якуми Раиси Бонки миллии Тоҷикистон Нуралиев Ҷ.К.,иттилоъ дод, ки бо назардошти ба эътидол омадани вазъи бозори хариду фурӯши долл. нақди ИМА ва бо мақсади ба низоми қурби ягонаи мубодилавӣ гузаштан, бо дастури Бонки миллӣ қурби хариду фуруши долл. нақди ИМА аз ҷониби ташкилотҳои қарзӣ муқаррар карда мешавад.

Номбурда таъкид кард, ки мақсад аз ҷорӣ кардани механизми нави муқаррарсозии қурби асъори нақдӣ, пеш аз ҳама, кам кардани фарқияти байни қурбҳо, пешгирӣ кардани фарқияти назарраси даромади амалиётҳои ҳаннотӣ, ба танзим даровардану таъмини шаффофияти фаъолияти мубодилавии муассисаҳои ташкилотҳои қарзӣ ва тадриҷан гузаштан ба низоми қурби ягонаи мубодилавӣ мебошад.

Оид ба ҷанбаҳои мусбӣ ва манфии гузариши зина ба зина ба қурби ягонаи мубодилавӣ, таъмини фаъолияти муназзаму босуботи бозори дохилии асъор ва муътадилии қурби пули миллӣ Ханс Тиммер ва аъзои дигари ҳайати Бонки ҷаҳонӣ андешаҳои худро баён карданд.

Дар қисмати ҷамъбастии мулоқот тарафҳо ба хулосае омаданд, ки дар ояндаи наздик барои дастгирии ичтимоии аҳолӣ ва ҷоннок намудани фаъолияти бозори молиявии ҷумҳурӣ тарҳҳои наву ояндадорро таҳия ва пешниҳод хоҳанд кард.