Аз ин ба баъд шахсони воқеӣ (резидент ва ғайрирезидентҳо) метавонанд асъори нақди хориҷиро ба суратҳисобҳои бонкии дар ташкилотҳои қарзии Тоҷикистон кушодаашон бе маҳдудияти ҳаҷми маблағ ва бе пешниҳоди ҳуҷҷатҳои тасдиқкунандаи манбаъи пайдоиши онҳо ворид намоянд.

Чанде қабл Бонки миллии Тоҷикистон (БМТ) дар ин хусус қарори иловагии дахлдор қабул намуда, онро ба ташкилотҳои қарзии ҷумҳурӣ ирсол намуд.

Бино ба маълумоти хадамоти матбуоти БМТ, ин дастури иловагӣ бо мақсади фароҳам овардани шароити мусоид барои ҷалби сармояи дохилӣ ба иқтисодиёти ҷумҳурӣ, маҳдуд кардани гардиши ғайрирасмии асъори хориҷӣ ва таъмини минбаъдаи рушди низоми бонкӣ қабул шудааст.

Гуфта мешавад, ташкилотҳои қарзӣ вазифадоранд асъори нақди хориҷии барои пур кардани суратҳисобҳои бонкӣ пешниҳодкардаи шахсони воқеиро бе маҳдудият, бо риояи талаботҳои муқарраркардаи санадҳои меъёрии ҳуқуқӣ қабул намоянд.

Зимнан зикр мегардад, ки ташкилотҳои қарзӣ ҳамчунин вазифадор карда мешаванд, ки тартиби мазкури ба суратҳисоби бонкӣ ворид кардани асъори нақди хориҷиро ба кормандони мутасаддии муассисаҳои зертобеъ ва муштариён-моликони суратҳисобҳои бонкӣ (шахсони воқеӣ) расонида, риояи ҳатмии онро таъмин намоянд.