Раёсати Бонки миллии Тоҷикистон (БМТ) фаъолияти воҳиди яке аз низоми пешрафтаи пардохтии кортҳои бонкӣ – Mastercard-ро тамдид кард.

Ба иттилои шуъбаи матбуоти БМТ, бо қарори Раёсати Бонки миллӣ аз 12 октябри соли 2021, Mastercard Europe SA барои кор дар бозори пардохти ҷумҳурӣ ба муҳалти 5 сол иҷозатнома гирифт.

Дар маълумот зикр мегардад, ки иҷозатномаи пешинаи ба ин низоми пардохт дар соли 2018 додашуда аз эътибор соқит гардидаааст.

Зимнан идораи низоми пардохт вазифадор карда шудааст, ки сабти дахлдорро дар Феҳристи операторони низоми пардохтӣ ворид намояд.

Mastercard низоми байнулмилалии пардохт мебошад, ки дар 210 кишвар ва қаламравҳои саросари ҷаҳон 22 ҳазор воҳиди корӣ дорад. Қароргоҳи корпоратсия дар Ню-Йорк воқеъ аст.

Mastercard дар баробари Visa ва China Union Pay яке аз се бузургтарин низомҳои пардохти ҷаҳонӣ ба шумор меравад.

Аммо дар Тоҷикистон ба кортҳои корпоратсияи мазкур танҳо дар як бонк – “Халиқ бонк Тоҷикистон” хидматрасонӣ анҷом дода мешавад.

Дар БМТ ба “Азия-Плюс” хабар доданд, ки бо тамдиди муҳлати фаъолият Mastercard Europe SA ният дорад, ки ба кораш дар ҷумҳурӣ тавсеа бахшад.

Зикр шуд, ки айни замон ҷиҳати роҳандозии фаъолияти муштарак бо “Спитамен Бонк” гуфтушунидҳо ҷараён дошта, инчунин имзои созишнома бо дигар бонкҳои кишвар дар назар аст.

Дар Феҳристи операторони низомҳои пардохти БМТ айни замон 16 ширкат қарор доранд.

Тибқи маълумоти БМТ, феълан аз ҷониби ташкилотҳои қарзии Тоҷикистон кортҳои пардохти Низоми милии пардохти “Корти миллӣ”, низомҳои байнулмлалии пардохти VISA ва Mastercard, кортҳои кобейҷингии (кортҳои муштарак)-и низомҳои пардохти UnionPay ва НМП “Корти миллӣ”, кортҳои пардохтии низомҳои дохилии ташкилотҳои қарзии молиявӣ нашр ва ба муомилот бароварда мешаванд.

То 1 июли соли 2021 шумори умумии кортҳои пардохтии бонкии дар муомилот қарордошта 3 млн 750 ҳазор ададро ташкил медиҳад, ки 42% зиёдтар нисбат ба ҳамин давраи соли гузашта аст.

Ҳиссаи кортҳои пардохтии Mastercard дар бозори Тоҷикистон ҳамагӣ 0,4%-ро ташкил медиҳад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.