Ҳаҷми гардиши молу маҳсулот байни Тоҷикистон ва Қазоқистон дар соли 2021 ҳудуди 1,2 млрд долларро ташкил дод, хабар медиҳад Агентии омори ҷумҳурӣ.

Қазоқистон баъд аз Русия дуюмин кишвари шарики тиҷоратии Тоҷикистон аст, ки муомилоти молиаш бо Тоҷикистон аз ҳадди 1 млрд доллар гузашт.

Соли гузашта гардиши мол байни Тоҷикистону Қазоқистон тақрибан 30% афзоиш ёфтааст. Дар сохтори он беш аз 820 млн доллар ба воридоти маҳсулот аз Қазоқистон ва 360 млн доллар ба содирот аз Тоҷикистон рост меояд.

Бар асоси омори расмӣ, соли гузашта ба Тоҷикистон ҳудуди 1 млн тонна гандум ва орд ворид шуд. Аз ҳисоби гандуми дар дохили кишвар истеҳсолшуда ҷумҳурӣ танҳо қариб аз се як ҳиссаи талаботи худро ба орд таъмин карда метавонад.

Ғайр аз ин, ҳудуди 90% гази моеъ, ки зиёда аз 60%-и нақлиёти автомобилии Тоҷикистон бо истифода аз он кор мекунанд, аз Қазоқистон оварда мешаванд.

Аз Қазоқистон бештар орду гандум, гази моеъ, маснуоти ордӣ, чарбу ва равғанҳои ҳайвоноту растанӣ, собун, гаҷ ва ғайра оварда мешаванд.

Инчунин ба миқдори зиёд маҳсулоти нафтӣ, сохторҳои (прокатҳои) металлҳои (фулузоти) сиёҳ, махсулоти кимиёи гайриорганикӣ ворид карда мешаванд.

Аз Тоҷикистон ба Қазоқистон пахта, алюминий ва маснуоти он, маъдан, сабзавоту мева, инчунин маҳсулоти нассоҷӣ содирот карда мешавад.

Ҳиссаи гардиши молу маҳсулот бо Қазоқистон дар соли гузашта аз панҷ як ҳиссаи гардиши тиҷорати хориҷии Тоҷикистонро, ки ба 6,4 миллиард доллар наздик шуд, ташкил дод.

Шарики асосии тиҷоратии Тоҷикистон Русия боқӣ мемонад, ки ҳаҷми гардиши мол бо ин кишвар зиёда аз 1,3 млрд долларро ташкил медиҳад. Ҳаҷми савдои дуҷониба бо Чин ба 840 млн доллар ва Ӯзбекистон - ба 450 млн доллар баробар аст.

Соли гузашта Тоҷикистон бо 120 кишвари дунё муомилоти додугирифти молу маҳсулот анҷом додааст, ки ҳудуди 50%-аш ба 10 кишвари ИДМ рост меояд.

Тавозуни савдо манфӣ аст: содирот - зиёда аз 2,1 млрд доллар ва воридот - 4,2 млрд доллар.

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.