Маркази “Тоҷикстандарт” дар вилояти Суғд аз ошкор шудани 1370 тонна маводи сӯхте хабар медиҳад, ки 42 тоннаи он тариқи қочоқ аз марзи Қирғизистон ба Тоҷикистон ворид шудааст. Баъди санҷиши лабараторӣ масъулин ин миқдори зиёд сӯзишвории нафтиро барои истифода номувофиқ дониста, маводро барои баррасӣ ба мақомоти ҳифзи ҳуқуқ ирсол кардаанд.  

Ғуфрон Эргашов, сардори озмоишгоҳи маҳсулоти нафтӣ рӯзи 9-уми феврал зимни нишасти хабарии ин ниҳод гуфт, маҳсулоти нафтии ошкоршуда “ба талаботи регламенти техникии Тоҷикистон мутобиқ набуд”. Вай афзуд, санҷиши лабараторӣ нишон дод, ки беш аз 1327 тонна маҳсулоти сӯзишвории воридотӣ аз кишварҳои Русия, Қазоқистон ва 42 тонна маводи қочоқӣ аз марзи Қирғизистон ба талаботи стандарт ҷавобгӯй набуд.

“Намуди сӯзишвории бензин 27 тонна, дизел 19 тонна, моъеи хунуккунанда 1 тонна, нафт 1322 тонна маҳсулоти ғайристандартӣ дониста шуда маводҳо барои баррасӣ ба мақомоти ҳифзи ҳуқуқ ирсол гардид. Мисол бензини навъи АИ-92-ро вақте санҷидем бензини АИ-80 баромад ва дигар намуд ҳам дар натиҷаи санҷиш ба талаботи техникӣ ҷавобгӯй набуд”.

Ба иттилои Маркази “Тоҷикстандарт” маводи сӯхти қочоқиро мақомоти интизомӣ дар соли 2021 ошкор карда ва баъди хуллосаи ниҳоӣ маводро барои баррасӣ дигарбора ирсол кардаанд. 

Дар ҳоле ин ниҳод аз ошкору ғайристандарт баромадани даҳҳо тонна маводи сӯхти қочоқӣ хабар медиҳад, ки шуруъ аз оғози моҳи майи соли гузашта ба далели муноқишаи хунин дар марз Қирғизистон додугирифти  ҳама гуна молу маҳсулот бо Тоҷикистонро манъ кард. Ва то ҳол ба ҳаракати озоди мошинҳои боркаш иҷоза нашудааст.

Омори ошкор шудани 42 тонна маҳсулоти сӯхти қочоқии ғайристандартӣ дар ҳолест, ки соли 2020 вақте марзҳо боз буд бино ба маълумоти Маркази “Тоҷикистандарт” мақомоти интизомии Суғд ҳамагӣ беш аз 45 тонна сӯзишвории ғайристандартиро ошкор карда буданд.   

Маркази “Тоҷикстандарт” дар вилояти Суғд гуфт, ки маводи сӯхти ошкоршуда бештар бо сабаби аз меъёр баланд будани миқдори сулфур, ки ҳангоми бухоршавӣ ба муҳити зист ва инсон хатарнок аст, ғайристандарт дониста мешавад. 

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.