Қарзи кредитории корхонаву ташкилотҳои Тоҷикистон то аввали соли ҷорӣ каме бештар аз 60,5 млрд сомонӣ (5,4 млрд доллар бо қурби аввали соли 2022)-ро ташкил дод, хабар медиҳад Агентии омори ҷумҳурӣ.

Ин қариб ба андозаи 32% ё худ 27,8 млрд сомонӣ (наздики 2,5 млрд доллар бо қурби миёна дар соли 2021) камтар нисбат ба нишондиҳандаи аввали соли 2021 - 88,3 млрд сомонӣ (зиёда аз 7,8 млрд доллар) мебошад.

Қарзҳои батаъхирафтода дар сохтори қарзи кредиторӣ ҳамагӣ ба 3,7% - ҳудуди 2,3 млрд сомонӣ баробар аст.

Зиёда аз нисфи корхонаҳои зиёновар дар Душанбе ва минтақаи гирду атрофи он ҷойгир шудааст.

Қарздори нисбатан зиёдтар байни корхонаҳои Тоҷикистон ШСХК “Барқи тоҷик” мебошад, ки қарзи кредитории он то аввали ҳамин сол ҳудуди 32,3 млрд сомониро ташкил медиҳад.

Дар ҳамин ҳол, ҳиссаи корхона ва ташкилотҳои зиёновар дар давоми соли 2021 аз 25,5% дар аввали сол то ба 19% дар охири сол коҳиш ёфтааст.

Ин асосан корхонаҳои саноати истихроҷи кӯҳӣ, бахши сохтмону нақлиёт ва соҳаи алоқа мебошанд.

Ҳукумат ҳанӯз соли 2019 ба сохторҳои марбута дастур дода буд, ки дар мавриди коҳиши қарзҳои корхонаҳои бузурги давлатӣ чораҳои тахирнопазир андешида шавад. Бо ин мақсад Шӯрои ҳамоҳангсоз оид ба масоили идоракунии хавфҳои молиявии корхонаҳои давлатӣ таъсис дода шуд. Шӯрои таъсисёфта ба ҳимоя аз манфиатҳои молиявӣ ва амволӣ, ҷорисозии идоракунии корпоративӣ ва беҳбуди фаъолияти корхонаҳои давлатӣ, ки ҳиссаи давлат дар он зиёда аз 50%-ро ташкил медиҳад, уҳдадор шуд.

Мувофиқи маълумоти расмии оморӣ, дар ҷумҳурӣ ҳудуди 800 корхона бо сармояи давлатӣ ба қайд гирифта шудааст, ки нисбатан бузуртаринашон ҶСК «Ширкати алюминии тоҷик» (100%), ҶСК «Роғун» (95%), ҶСК «Тоҷиктелеком» (95%), воҳидҳои «Барқи тоҷик» (100%), ҶСК «Тоҷиктрансгаз» (100%), ҶСК «Фурудгоҳи байнулмилалии Душанбе» (100%), ҶСК «Тоҷик Эйр» (100%), ҶСК «Сементи тоҷик» (100%) мебошанд.

Дар Telegram, Facebook, Instagram, OK ва ВК бо мо бимонед.