Дар семоҳаи аввали соли 2022 аз Эрон ба Тоҷикистон 12 адад трактори “Тоҷ Ирон - 475, 470”, 100 адад испор ва 427 тонна хӯроки моҳӣ ворид гардид. Ҳарчанд ин начандон зиёд бошад ҳам, вале ба оғози давраи нави ҳамкории кишоварзони ду кишвар замина гузошта шуд.

Тавре ки шуъбаи матбуот ва иттилооти Вазорати кишоварзии ҷумҳурӣ хабар медиҳад, 20 май вазири кишоварзии Тоҷикистон Саъдӣ Каримзода сафири Эрон дар Тоҷикистон Муҳаммадтақӣ Собириро ба ҳузур пазируфт.

Тарафҳо оид ба ҳамкориҳо дар самти растанипарварӣ, чорводорӣ, бунёди боғҳои интенсивӣ, ҳифзи растаниҳо аз касалиҳо ва ҳашаротҳои зараррасон, содироти маҳсулоти кишоварзӣ, ба роҳ мондани сохмони марказҳои логистик, сохтмони сардхона барои нигаҳдории маҳсулотҳои кишоварзӣ, табодули таҷриба дар самти бозомӯзӣ ва дигар масъалаҳоро мавриди муҳокима қарор доданд.

Гуфта мешавад, дар давоми соли 2021 аз Эрон ба Тоҷикистон 427 тонна хӯроки моҳӣ ва дар давоми 3 моҳи соли равон 12 адад трактори “Тоҷ Ирон – 475, 470”, 100 адад испор, 34 адад тойбанду тагрезчин, 10 адад алафдаравак, 4 адад нармкунак (култиватор) ворид карда шудааст.

Қобили зикр аст, ки имрӯз тракторҳои истеҳсоли Эрон ба 30 кишвари саросари дунё, аз ҷумла ба кишварҳои минтақаи Осиёи Марказӣ содир карда мешаванд. Тракторҳои истеҳсоли Эрон бештар барои кору истифода дар боғҳо пешбинӣ шудаанд.

Аз соли 2006 то соли 2017 дар Тоҷикистон корхонаи муштараки истеҳсоли тракторҳои “ТоҷИрон” фаъолият дошт. Он дар заминаи корхонаи «Ҳумо»-и Душанбе ва корхонаи истеҳсоли трактори Табрез ба истифода дода шуд. Тибқи созишнома, 51%-и саҳмияҳои корхонаи муштарак ба ҷониби Эрон тааллуқ дошт. Дар “ТоҷИрон” соле 2 ҳазор трактор васлу насб карда мешуд.

Қатъи истеҳсоли тракторҳоро дар Тоҷикистон он замон ҷониби Эрон рақобати шадид дар бозор маънидод карда буд.

Гап сари он аст, ки Тоҷикистон бо нархи 8 ҳазор доллар аз Минск тракторҳои “Беларус” ворид мекард. Васлу насби тракторҳои эронӣ бошад, ҳадди ақал 10 ҳазор доллар талаб мекард.

Айни замон якчанд ширкату фирмаҳо аз қабили "Тоҷикагролизинг", "Мадади Турсунзода», "Агролизинг" ҳамасола ба Тоҷикистон то 300 адад тракторҳои тамғаи “Беларус” ворид мекунанд.

Тибқи иттилои сомонаи Иран.ру бо истинод ба мақомоти омори Эрон, семоҳаи аввали соли ҷорӣ ширкатҳои Эрон 93 ҳазор адад кмобайнҳои ғалладаравӣ ва 4,3 ҳазор адад трактор истеҳсол кардаанд, ки дар муқоиса бо ҳамин давраи соли гузашта мутаносибан 5,7% ва 1,1% зиёдтар аст.

Соли 2021 ҳаҷми савдои дуҷониба байни Тоҷикистон ва Эрон ба 121 млн доллар расид, ки 2 баробар зиёдтар нисбат ба соли 2020 мебошад. Ҷонибҳо ният доранд, ки ин нишондиҳандаро то ба 500 млн доллар расонанд.

Дар Telegram, Facebook, Instagram, OK ва ВК бо мо бимонед.