Вазорати корҳои дохилӣ аз боздошти марде хабар медиҳад, ки аз як сокини Душанбе панҷ автомашинаи гаронбаҳои хориҷиро гирифтаву пулашонро бар нагардонидааст.  

ВКД, ки ному насабаи боздоштшударо расонаӣ накардааст, аз ӯ як сокини 42-солаи ноҳияи Айнӣ ном бурда ва гуфтааст, ки бо гумони қаллобӣ дастгир шуд.

"Номбурда, моҳи феврали соли 2020 бо роҳи фиреб ба боварии марди 36-солаи сокини пойтахт даромада, аз ӯ панҷ автомашинаи тамғаҳои “Тойота-Камри”, 2-адад “Лексус-350”, “Хендай-Саната” ва “Тойота Версо”-ро ба маблағи 775 ҳазор сомонӣ нархгузорӣ карда гирифта, автомашинаҳоро фурӯхта, маблағашонро ба манфиати шахсиаш сарф намудааст".

Ҳамчунин ин ниҳод хабар додааст, ки ду ҷавони 22-солаи сокини шаҳри Истаравшани вилояти Суғдро бо гумони дуздии  молу ашёи рӯзгори як зани 24-солаи ин шаҳр низ боздошт кардааст.

Ба навиштаи торнамои ин ниҳод, нафараони боздоштшуда аз пештар, яке  бомоддаҳои 244 ва 365 Кодекси ҷиноятии  Тоҷикистон ва дигаре бо моддаи 244 суд шуда будаанд. Ин ниҳоди зарари расида аз ин амалро 26 ҳазору 280 сомонӣ ҳисоб кардааст.

Дар TelegramFacebookInstagramOK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути ViberTelegramWhatsappImo ба рақами +992 93 792 42 45 фиристед.